TVM plus : Oo tele mo mbaydi kesiri

0
370

TVM plus ko tele ɗiɗmo Muritani. Ina jeyanoo e ko addani mo soseede yiɗde sukkude won ɗeen jolɗe goodnooɗe e tele mawɗo o (yumma o) hono TVM, haa arti noon e hokkude heen leƴƴi leydi ndi kala waktuuji jonɗi, tawa kadi ko ñamri moƴƴiri. Nii woni sukaaɓe heewɓe ƴettaama heen, wonande ɗemɗe ngenndiije Pulaar, Sooninke e Wolof, e ballondiral e yimɓe jogiiɓe heen humpito, gollinooɓe e Duɗal Ɗemɗe Ngenndiije walla gollotooɓe e pelle pine ngenndiije, ko wayi no Ɓamtaare Pulaar ekn …

Hooreejo Fedde F.Ɓ.P.M. dariima heen nii darnde maantinnde ngam wallude ɓe gila e loowdi haa e yimɓe humpitiiɓe, tawi ko waawɓe winndude e tarde e ɗemɗe ngenndiije ɗe.

Hannde o, hay so payndaale ɗee fof cuwaa yettodeede, eɗen ceedtii kam, ooɗoo tele naatnii mbaydi kesiri tigi rigi, gila e ñamri jeewte mum haa e sifaa no ɗe njettinirtee.

Ina jeyaa e ko ɓuri maantinde e makko, kanko ooɗoo tele, kala ko omo waɗa, omo rokka yeru moƴƴo wonande leydi ndi, to bannge potal hakkunde leƴƴi ɗi e ngootaagu mum; omo feeñnina mbaydi Muritani e hol no foti siforaade mbele leƴƴi mum ina ngootiɗa.

To oon bannge, omo seerti e tele mawɗo o, ɗo nganndu-ɗaa, ñalnde kala yimɓe ina ceedoo heen geɗe ɗe peewaani, walla ɗe hakkille waawaa faamde. Yeru mum, ko ñalnde alarba 26 mars 2008, ɓe noddii toon kalifu awo, hono Hasan Sumaare ngam yeewtidde e mum e geɗe ɗe nokku mum halfinaa. Huunde haawniinde ñalnde heen : jaayndiyankooɓe ɓe naamnotoo mo ko e ɗemngal Arab, tawi noon kanko o jaabotoo ko e ɗemngal Farayse, huunde nde hay gooto waawaa faamde, nde alaa maanaa.

TVM Plus, to bannge mum, hanki jamma tan (alkamiisa 27 mars 2008), hokkii en yeru luulndiiɗo ɗuma, sibu yaltinii yeewtere faayondinnde, yowitiinde e ñawbuulu njogoram, e sifaa jooɗɗo sanne : jaayndiyankooɓe nayo, tawi ko yahrooɓe e cukaagu, debbo gooto e worɓe tato, haalooɓe ɗemɗe leydi ndi nay ɗee kala : ɓe ummoo e Wolof, ɓe paya e Arab walla Pulaar maa Sooninke : woni Muritani fof nani ɗo, kala keɗiiɗo maa dañ heen geɗal mum. Ɗumɗoo dey ko yeru jooɗɗo, potɗo semmbineede. Yo Alla waɗ barke e TVM PLUS !

So geɗe keddiiɗe ɗe ngolloraama nii, ngootaagu ngenndi ndi maa tabit tigi rigi.

Bookara Aamadu Bah