FONADH – hono dental pelle ngenndiije toppitiiɗe jojjanɗe aadee e Muritani – yuɓɓinii ñalɗi heblo tuggi ñande 12 haa ñande 17 lewru marse hitaande 2012 : to Bahbahɓe (12 haa 14/03/2012) : wonande jeyaaɓe Bahbahɓe e ummiiɓe Kayhayɗi, e to Rooso (15 haa 17/03/2012) : wonande jeyaaɓe Rooso e ummiiɓe Ɓoggee.
FONADH – hono dental pelle ngenndiije toppitiiɗe jojjanɗe aadee e Muritani – yuɓɓinii ñalɗi heblo tuggi ñande 12 haa ñande 17 lewru marse hitaande 2012 : to Bahbahɓe (12 haa 14/03/2012) : wonande jeyaaɓe Bahbahɓe e ummiiɓe Kayhayɗi, e to Rooso (15 haa 17/03/2012) : wonande jeyaaɓe Rooso e ummiiɓe Ɓoggee.
Fandaare heblo ngo ko wallitde terɗe pelle FONADH ɓeydude humpito mum en e ko feewti e fannu kilinik sariya ; ɗum toɗɗii ko pelle jeyaaɗe e FONADH gonɗe e diiwaanuuji Barakna, e Gorgol, kam e Tararsa, haa teeŋti noon e meeriiji Rooso, e Ɓoggee, e Baabaaɓe, e Kayhayɗi. E ko ɓuri teeŋtude, heblo ngoo waɗanaa ko terɗe FONADH e juɓɓule mum e nder diiwaanuuji ɗii, e kala karallo kalfinaaɗo kilinik sariya e nder meeriiji ɗii, e terɗe jeyaaɗe e pelle yimɓe taccinanooɓe ngartiraa Senegaal.
E ko ɓuri teeŋtude, faandaare heblo ngoo ko wallitde tawtoraaɓe ɓee :
- ɓeydaade faamde hol ko woni kilinik sariya, e hol golle kilinik sariya ;
- anndude njuɓɓudi kilinik sariya, e no kilinik sariya siinirta golle mum ;
- yiilaade kuutorɗe laaɓtuɗe ballooje kilinik sariya gollaade e anndeede no haanirta nii
- huutoraade kaɓirɗe e peeje newnooje denndingol goytaali walla gullitaali yimɓe tooñaaɓe, e toppitaade doosiyeeji mum en, e jojjanɗi mum en jaɓɓaaɗi (jey leydi, galleeji, ndonu, e ko nanndi heen).
Hebli yimɓe ɓee e ɗee geɗe ko sokna Rokkaya Gay, ummiiɗo Ndakaaru, gardiiɗo fedde nde wonaa lamuyankoore wiyeteende RADI (ko dental pelle), sabu humpito makko e ɓuri duuɓi noogaas e ko feewti e kilinik sariya (enen noon ko jooni naat ɗen e golle kilinik sariya). Huufi heblo ngo ko Aamadu Umaar Jah (hooreejo Fedde Ɓamtaare Pulaar e Muritani, jooɗaniiɗo Ardorde/Kuuɓal FONADH), kam e Jibril Yero Jiggo (kalfinaaɗo ciynugol eɓɓaande ndee). Keewal yimɓe tawtoraaɓe heblo ngo to Baabaaɓe e Rooso ko capanɗe nay e ɗiɗi (42) neɗɗo : 18 debbo, e 24 gorko.
Heblo ngo yahrii no haanirta nii, yimɓe fof ndokkii heen miijooji mum en, ngaddii ngaddii heen balle mum en, no haanirta nii.
E innde am, e innde pelle jeyaaɗe e FONADH, e innde Koolaaɗo Kuuɓal FONADH, eɗen njetta Rokkaya Gay sabu darnde mum, e ballal mum e ñalɗi ɗii. Eɗen njetta kadi denndaangal tawtoraaɓe heblo ngoo. Eɗen njaakorii maa ngoo heblo wallit ɓe siynude golle kilinikaaji nay (4) ɗii, hono gonɗi e meeriiji Rooso, Ɓoggee, Baabaaɓe, e Kayhayɗi.
Hol ko woni kilinik sariya ?
Kilinik sariya wayi ko no kilinik safaara (doktoor) nii. Ene anndaa wonde kilinik safaara toppitii ko safrude yimɓe walla jawdi. Kilinik sariya noon toppitii ko wallitde yimɓe yooltude hujjaaji mum en, walla jojjanɗe mum en aadee jaɓɓaaɗe (jeyi leydi, galleeji, kaayitaaji juddu, ndonu, kareeli walla luure peewtuɗe e geɗe renndo, e ko nanndi heen). Kilinikaaji sariya gonɗi Rooso, e Ɓoggee, e Bahbahɓe, e Kayhayɗi mbaɗanaa, e ko ɓuri teeŋtude, ko taccinanooɓe ngartiraa e ɗii meeriiji. Kono, sikke alaa, so yimɓe woɗɓe e ko wonaa ɓeen tan, kadi e ko wonaa e hoɗɓe e ɗiin nokkuuji tan, so kollitii toon caɗeele mum en, ma ɓe mballite no haanirta nii.
Nuwaasoot 26/03/2012
AAMADU UMAAR JAH
Nate gollordu nduu
