Ñalnde aljumaa 10 marse 2017, Dental Afrik saaktii jokkel ñiiɓirde mum enternet ; ngel wiyetee ko ‘.africa’, ɗuum woni heɓtinirde mum (kartal mum dantitee) nder enternet. Kala jiɗɗo lowre lowre mum enternet innitoroo Afrik, ina foti jokkude e innde ñiiɓirde ndeen lowre enternet, jokkel « .africa » ngel. Yeru so neɗɗo yiɗii yimɓe ngannda lowre mum enternet ina jokkondiri walla waɗanaa tawo ko afriknaaɓe, ina waawi innirde nde “innde-welaa.africa”.
Nafoore majjum ko mbele afriknaaɓe e gollorɗe mum en ina ɓeydoo yiytinaade. Njaru domen ndee ko 18 dolaar Amerik (hedde 6 000 ugiyya) hitaande kala. Njeeygu mayre maa huuɓnu fotde 70% e soklaaji kaalis Goomu Dental Afrik.
Domen maa woni coktirgal ñiiɓirde maa nder enternet.
Ñiiɓirde enternet fof waɗi ko taƴe keewɗe, taƴre heen kala won ko maandinta. Ko nii woni lelngo kala ñiiɓirde enternet : www (puɗɗorgel) e innde domen. Kayre INNDE DOMEN ndee kadi nde waɗi ko gane ɗiɗi : CALLALAL MAAƊE e JOKKEL (TLD – Top Level Domain).
Innde domen ina foti hollitde walla kam maandina ko paanditi-ɗaa e lowre enternet njiɗ-ɗaa sosde ndee, kadi kelme kuutorto-ɗaa ɗee fof won faamamuya poti roondaande. Yeru innde domen kabaruuji.mr ina hasii faamreede ko kabaruuji joopiiɗi Muritani, sibu jokkel « mr » ngel ko Muritani jeyi ɗum.
Leyɗe winndere ndee kala ina njogii heen, ngootiri kala, jokkel mum tawi ko kañum rokkirta ɗum: .mr ko Murtani ; .sn ko Senegaal, .ma ko Maruk ekn. Ɗum woni ko anndiraa domenaaji ngenndiiji dowrowi walla : ko ɗe hedde 260. Ina woodi kadi domenaaji dowrowi kuuɓtodinɗi, ina waɗi heen kadi domenaaji bellitaaɗi, yeru .com (ina hasii ɗe ngona ñiiɓirɗe lowe kumpital), .net (ina hasii ɗe njoopoo ko faati e enternet), .org (pelle e juɓɓule), .info (ko faati e kabaruuji) ekn… Ko ɗe hedde 300. Ɗe udditaa ko e hitaande 1985. Ina woodi kadi domenaaji dowrowi tammbaaɗi, ko wayi no .gov (laamuuji), walla .edu (janngirɗe toowɗe haa teeŋti to Amerik) walla .mil (juɓɓule konu Amerik). Ina woodi heen kadi keeriiɗe, ko wayi no .paris ekn.
Bookara Aamadu Bah
www firti ko : World Wide Web, woni Geese Kuuɓtodinɗo Winndere
