Yontere ɗemngal Farayse e Farankofoni (francophonie) yuɓɓinaama e leydi hee tuggi 17 marse 2018. Ɗum hawri kisa ko won ɓeen yimɓe jannguɓe ɗemngal Arab ina ñiŋa ngal, ina naamnoo yo Farayse yaltine leydi ndii. Ko e nder ɗuum, Ahmed wul Hamsa, hooreejo fedde muritaninaare farankofoni (Amf) siftinii wonde “wonaa hare woni hakkunde ɗemɗe kono ko galɗondiral (gootal kala ina alɗina goɗngal ngal) “.
“Wonaa no hono won ɓeen mbiyrata nii, Arab e Farayse mbaɗndaani daɗndu, kono ko ɗemɗe ɗiɗi timmondirooje hakkunde mum en, ko ɗe timmondirooje kadi e ɗemɗe leydi ndii goɗɗe ɗee, hono Pulaar, Sooninke e Wolof » e wiyde Ahmed Hamsa.”
Teddiniraa yontere ndee hikka ko Sokna Aysata Kan (meeɗnooɗo wonde jaagorgal e laamu Muttaar wul Daddaa). Ambasadeer Farayse e leydi ndii, hono Joël Meyer yettii Muritaninaaɓe sibu mum en jeyeede e wuurnuɓe ɗemngal Farayse e nder Muritani, haa teeŋti noon e winndooɓe (defte) ɓee. E wiyde makko : « Ɗemngal Farayse ina jogii darnde e Muritani, sawndo ɗemngal Arab ngal ngal fooɗondiraani, sawndo ɗemɗe ngenndiije ».
Ɗumɗoo hawri hikka ko e Hooreejo leydi Farayse e hoore mum, ina lelni tuugnorgal ƴellitgol ɗemngal Farayse. Ñalnde 20/3/2018 o hollitii feere ndee, e nder 30 kuulal, mbele ɗoo e 2050, 700 miliyoŋ neɗɗo ina mbaɗta haalde ngal, ngal wonta ɗemngal tataɓal to bannge keewgol haalooɓe (jooni ko ngal jeegoɓal caggal Engele, Manndari (ɗemɗe Sinuwaaje), Españool, Arab, e Inndo). Hol to ɓeen yimɓe njogori dañeede ? Yoga e maɓɓe ɓe nganniyii waawnude ɗum en Farayse ko e Afrik. Nder ɗuum, maa ɓe ƴettu peeje to bannge jawdi ɗe meeɗaa ƴetteede mbele jannginooɓe ɗemngal ngal « ina daña ngonka moƴƴa » ngam moƴƴinde golle mum en, sukaaɓe ɓee kadi njannginiree ngal no moƴƴirta nii. Ko ɗum addani huunde e jannguɓe Afriknaaɓe (ko nanndi e Ashil Mbemmbe) jeertinde e kala sifaa njiimaandi kesiri, sibu e ko ɓuri teeŋtude ɓeen haalooɓe Farayse hesɓe ko e Afrik nganniyaa heɓeede.
Bookara Aamadu Bah
