Gila laylayti renndo ngari, ene naɗti seerndude Jayndiyankooɓe e « aayniyankooɓe ». Kala koccuɗo kabaaru, ko o waawi wonde fof, e no o waawi siforaade fof, aaynoto, sara e aduna. Waɗa heen kulɓinooji, waɗa jalnooji, kono waɗa kadi taƴooji enɗam e gaawooji kusummeeji e nder ɓerɗe, haa nii wooda ɗo ɗum jibini taƴ-enɗamaagal. Ɗuum ene jeyaa e ko saabii haa won e pelle men ƴefti pellital renndinde sukaaɓe, ngam anndinde ɗumen huunde seeɗa e karallagal jaayndiyankaagal. Hay so luggiɗaani, ɓe nganndinee kam, holi no kabaaru ƴoogirtee, holi no kabaaru defirtee ko adii nde ene yaltinee. Holi kabaaru potɗo bayyineede e mo fotaani bayyineede. Holi no kabaaru bayyinirtee. Holi ko woni fayndaare bayyingol ngol…
Sikke alaa, haralleeɓe e oo fannu kollirii en « Paandaale kabaaru ɓurɗe teeŋtude ɗee ko humpitde, rewi heen ko jannginde e tinndinde, refti heen ko weltinde ». Kono kabaaru ene wela, tawa no yettiniraa nii feewaani. Ene janngina tawa laawol jettinirangol ngol ɓeydotoo ko majjinde. Ɗum ene jeyaa e ko saabotoo haa won e kabaruuji kulɓina walla njibina sunu e nder ɓerɗe.
Ko he ndiin mbaydi Fedde AIDES yuɓɓini heblo « jaayndiyankooɓe renndo » tuggi tati lewru deesaambar 2021 haa 6 lewru mars 2022. Caggal jarribooji e kawgelaaji, ko ñalnde 27 lewru mars ɓe ndokkaa seedanteeje maɓɓe e tawtoreede hoohooɓe mawɓe, ɓe jeyaa e mumen Jallo Daawuuda Sammba, ginniraaɗo haralde ndee, Meer mo Neere Waalo e Koolaaɗo Kuuɓal Nokku Ñaawirɗo dowrowo leydi Muritani (Sécrétaire Général de la Cour Supreme). En njettii Mammadu Hammadi Njaay lollirɗo Bosko, keblatnooɗo haralde ndee.
MSG
