Jokkondiral Fooyre Ɓamtaare e Huley Bah, jiiloowo Senndikaa Ngenndi Cellal Renndo to Gorgol, gollotooɗo to opitaal Kahayɗi.
Jokkondiral ngal waɗi ko caggal caggal joɗnde nde yoga e gollotooɓe e oon nokku njooɗinoo ñalnde ñalnde alkamiisa 16 mee (duujal) 2024, to leegal Lakommbo he nder Kahayɗi.
Fooyre Ɓamtaare (FƁ) : Sokna Huley Bah, Fooyre Ɓamtaare salminii ma.
Huley Bah (HB) : Mi salmitiima Fooyre e denndaangal ardiiɓe haa e gollotooɓe mum.
FƁ : Aɗa waawi humpitde min holi ko saabinoo joɗnde mon ñalnde alkamiisa 16 mee 2024.
HB : Saabinoo joɗnde amen ndeen ɗoon, ko hollitde renndo ngoo caɗeele ɗe min nguuri ɗoo he nder opitaal Kayhayɗi.
FƁ : Caɗeele ɗe nguur-ɗon, aan e holi ɓeen ?
HB : Minen fof ko min sappo e njeenayo, debbo e gorko, seertuɓe postooji, kono rennduɓe caɗeele.
FƁ : Ɗuum ko mbiyataa caɗeele, holi no ɗum wayi ?
HB : Wonaa miin wiyi ɗum caɗeele, ko kañum woni caɗeele. Ɗeen caɗeele ko nii mbayi : amin njogii ñamaale pawondirɗe ɗe min ndonki heɓde ; amin njogii ñamaande gardugol, lebbi sappo min keɓaani ; amin ndewa ɓe ko wiyetee “Motivation” (fɓ : coftinirdi), lebbi sappo e ɗiɗi ; amin ndewa ɓe ko wiyetee “indemnité de responsabilité”(fɓ : ndaamordi kellifuya) lebbi sappo e jeeɗiɗi. Ko ɗuum woni caɗeele ɗee.
FƁ : He kaan ngonka, holi peeje kuutori-ɗon ngam safrude ɗeen caɗeele ?
HB : Min ngidii ko haaldude e maɓɓe kamɓe ardiiɓe min ɓee. Alaa ko gasi. Min ngoytaniima yimɓe yonɓe ɓe min ɗamininoo ina mbaawi gaynude heen huunde. Kono alaa fof ko gasi heen tawo. Min njahii haa to Waali diiwaan Gorgol, min ngullitii ɗum. Ko caggal ɗuum min puɗɗii hofngo juuɗe e diiñooji.
FƁ : Caggal ɗee peeje fof, holi jaabawol ngol keɓ-ɗon ummaade e gollurdu nduu ?
HB : Haa to njaaraten ɗoo, alaa jaabawol ngol min keɓi. Won podanɗo min noon ina daroo heen. Ko he mum min ɗaminii caggal Allah.
FƁ : Konngol ma cakkitiingol ?
HB : Konngol am cakkitiingol ko wiyde, e inɗe amen minen kala, ko min naamnii koo, ko hakkeeji amen laaɓɗi. Ko huunde winndaande, goongɗunde, heɓtinaande. Amin poti heɓde ko aldaa e tooñeede, riiweede, fekteede walla jippineede e posto mo wonnoo, sabu ngonnoo-mi ko Responsaable Saas-faam (mawɗo Saas faam), kono e hofngo juuɗe hee, mi jippinaama.
FƁ : Huley Bah, a jaaraama.
HB : Fooyre Ɓamtaare jaaraama.
