E hitaande 2009, NASA yowii nder weeyo niiwnorgal ine wiyee WISE, kattanngal yiyde kaaƴe asamaan jogiiɗe won ndiin mawneeki, kaytooje nder Sato naange, ko wayi no jirlotooɗe, e koode niɓɓe (ine heen koodaatinon puron) ɓalliiɗe Naange kam e koode jiiryiirngal men ɗe punndi weeyo wirni en. Kono e hitaande 2011, caggal nde ngal paani ɓuuɓtinoojam, NASA ɗannini ngal. Kono caggal nde ƴeewtii, ɓe mbiyi hay sinno ngal nattii waawde yiyde geɗe ɗe caafe mum lesboɗewol leefi no feewi, angal waawi kam yiytude no moƴƴi kaaƴe goɗɗe e laaciije jaltinooje caafe lesboɗewol doolnuɗe caggal nde Naange wultini ɗum en, ndewi sara men. Nii woni e hitaande 2013 niiwnorgal weeyo ngal softinaa, kono innitiraa Neowise (Wase keso), halfinaa reende kaaƴe e laaciije, haa teeŋti noon baawɗe wonande Ngaawe (leydi men ndii) tanaa.
Caggal nde ngal gollii duuɓi 10, Neowise kam ne heɓii yamiroore ummoraade e Leydi, yo ñif : sunu mawɗo wonande kippuuji gollotonooɓe heen ɓee. Neowise ƴettii nate asamaan oo kala : fotde 1,45 miliyoŋ ɓete lesboɗewol ko ine tolnoo e 44 000 kuule gonɗe he sato naange. Nder ko ine ɓura 3 000 kaaƴe kaytooje jiytaaɗe ɗee, heen 215 ko Neowise yiyti ɗum en jooni. Neowise yiytii laaciije 25 kese, ine heen laaciire C/2020 F3 jiyotonooɗe he yitere mehre he ceeɗu 2020.
Neowise dartiniraaka sabu saɗeende karallaagal. Ngal dartiniraa ko sabu jirlol maggal jooni ɓadtitoo leydi no feewi, ɗum noon ngal waawataa neldude Leydi kabaruuji baawɗi naftoreede. Hankadi heddii tan ko haa Neowise naata he hennduure Leydi, ɗoo e maayirɗe hitaande ngon-ɗen ndee, huɓɓira seeɗa-seeɗa haa royta. Lomtoytoo Neowise ko NEO Surveyor, niiwnorgal weeyo potngal yirlineede e hitaande 2027, ngam yiytude kaaƴe weeyo e laaciije.
Bookara Aamadu Bah
