He ɗii duuɓi cakkitiiɗi, sahaa e sahaa fof nguu ñawu mbiyeteendu Mpox (Monkeypox), hono bade waandu, ine feeña he Afrik hakkundeejo e hirnaange. Aduna oo ine waɗtunoo heen hakkille haa ngu waɗti feeñde he nokkuuji goɗɗi winndere ndee, he lewru duujal 2022. Ɗumɗoo noon, ko haawnii heen, ñawu bade aadee (ɗi ngoɗɗondiraani) ko ko momtanoo he winndere ndee he darorɗe kitaale 1980. waɗde naamnal na ɗoon :
Hol ko artiri nguu ñawu jooni ? Ñawu mbiyeengu Mpox (Monkeypox), so en pulii mbiyen “bade waandu” ko ñawu njanatnoongu he kullon ladde haa arti noon e kullon Afrik ŋoñotookon (jihe, doombi ekn.) kono mbaɗtungu yande he yimɓe. Ɗum ɗeɓata waade ko no ñawu kesu nii, nanndungu e bade yimɓe, kono ngu tookaaka no feewi (ngu heewaani warde). Gila he darorɗe lewru duujal (mee) ngu raaɓii yimɓe heewɓe to Orop. He ɗii duuɓi cakkitiiɗi, sahaa e sahaa fof angu feeña he Afrik hakkundeejo e hirnaange. Aduna oo ine waɗtunoo heen hakkille haa ngu waɗti feeñde e nokkuuji goɗɗi winndere ndee, he lewru duujal 2022. He darorɗe kitaale 1980, caggal nde bade yimɓe momtaa haa laaɓi he winndere ndee, feso haɓo-bade dartinaa. Kala fesaninooɓe ñawu nguu ine kisi he Mpox fotde 80%, nde tawnoo ko tuli bade yimɓe ine tula bade Mpox. He lewru sulyee (morso) 2022, Fedde Cellal winndere (OMS) waɗii ñawu bade waandu geɗal keñoraangal wonande cellal winndere ndee. Ɗuum ko caggal nde ngu layi laygol diwtugol aada nder 75 leydi ɗo ngu wonaano ñawu duumiingu. Hol ko saabotoo Mpox ? Wiris Mpox jogii ko dontere (ADN) jiidunde no feewi e dontere wiris gaddoowo bade yimɓe oo, momtiranooɗo feso e hitaande 1977.
Wiris Mpox idii wajjineede ko he 1958 to Copenhague (Danemark) he nder lohorgol baaɗi jogotonooɗi gaañanɗe he guri ɓalli mum en. Ko ɗuum addi innde bade waandu ndee. Ñawu nguu fof e innireede bade *waandu* wonaa baaɗi ndaaɓata yimɓe, kono ko ŋoñotooɗi (ŋefooji), ko wayi no doombi e jihe. Gila he maayirɗe 2022 OMS ɓuri heewde noddirde ñawu nguu ko “Mpox”. Angu waɗi eddaaji ɗiɗi : – Edda gadano oo tawetee ko he yupporde Konngo to Afrik hakkunde; – Edda ɗiɗmo oo tawetee ko he Afrik hirnaange. Mboros carotooɗo hannde to Orop oo ummorii ko he edda ɗimmo oo, gonɗo hannde to Niiseriyaa oo. Hol no ñawu nguu raaɓirta ? Mpox/bade waandu ko ñawu piɗoowu ummoriingu he kulle (jawdi). Mpox ummortoo yimɓe ko e ŋoñotookon (yeru he Afrik ummortoo ko he jihe ladde walla doombi Gammbi). Kono tan tunndunde kulle ɗee suwaa tawo yiyteede, hay so tawii wiɗto ngo Duɗal Pasteur saakti e hitaande 2021 faatungo e bade waandu to Afrik hakkundeejo, ine joopii naatirɗe keewɗe ummoraade he tuddule jawdi ladde keewɗe.
Raaɓo Mpox neɗɗo e neɗɗo rewrata ko e :
- • Jotondiral ŋaddet e jawdi piɗaandi ;
- • Jotondiral e ñawanɗe nguru walla e ɓulam guurɗiwal ;
- • Walla ŋaddet rewrude e kaɓirɗe daaɓaaɗe (ko wayi no mbertateeri walla e nokkuuji).
- •Walla toɓɓon foofaandu ummoriikon e neɗɗo piɗaaɗo.
Tuggi 2022 ujune neɗɗo piɗaaɗo Mpox mbinnditaama he leyɗe ɗo ñawu nguu duumaaki. Wiɗtooji nana mbaɗee ngam ɓeydaade faamde ñawu nguu, anndude iwdi mum e humpitaade no ngu raaɓirta. He darorɗe hitaande ndee fotde 548 ñawɗo mbinnditaama to Konngo, ummoriiɓe he nokkuuji leydi ndii fof. Jaawgol yiytude ñawɓe hesɓe ine wallitta no feewi ustagol raaɓo-raaɓo ngoo. Hol maale ñawu nguu ? Mpox/bade waandu feeñirta ko no bade yimɓe ɗe mbaawnaani nii, teskaaɗe nattii woodde gila hitaande 1980.
He nder Afrik ko nii Mpox feeñirta :
- • Fotde balɗe 12 mudda raaɓo e peeñgol maale gadane;
- • Ine hasii maale paawngal peeña (tampere, muso-hoore ekn.) fotde ñalawma haa balɗe 4 ; so maale gadane ɗee peeñii tan joomum waɗtat raaɓde ;
- • Rewata heen ko puɗtugol paali nder jonte 2 haa 4 haa teeŋti he newre junngo e njaaɓordi koyɗe wondude e ɓuutgol ñaale.
Rafi peeñɗo Orop gila duujal (mee) 2022 oo – cariiɗo e winndere ndee- ine feeñira futto paali saraaji njogoram walla kuutol. Ine hasii ñawɗo oo sella caggal jonte 2 haa 4, hay so safraaki. Kono ñawu nguu ine waawi waawnude, piɗe nguru ɓanndu ɗee ɓeydoo. E wiyde OMS, mboros Afrik oo ine wara fotde 3% haa 6% fiɗaaɓe ɓee. Tolno warngo mboros winndere 2022 oo ko hedde 0,03 (maayɓe 3 wonande 10 000 ñawɗo). Safaara Safaara kuutotenooɗo ngam safrude bade yimɓe goongɗinaama ine waawi safrude Mpox nder balɗe 15 so huutoraama law. Ko safaara moɗeteeɗo. Hol no ñawu nguu faddortee ? He nokkuuji ɗo ñawu nguu duumii (he Afrik), feere ɓurnde waawde huutoreede ngam faddaade Mpox, ko ustude jotondiral hakkunde yimɓe e kulle ladde e waɗde humpito e findinde yimɓe haa paama ñawu nguu ummortoo ko he kulle ladde ɗee. Gaa-gaa ɗuum ko gollaade ngam ustude geɗe ballitooje ñawu nguu, ko wayi no baasal, walla yowitaade he teewu kulle ladde, walla ɓiɗtondiral nder koɗorɗe, walla kareeji konuuji gaddooji dirtugol yimɓe.
E sifaa kuuɓtodinɗo, ngam ustude raaɓo hakkunde yimɓe, feere faddorde ndee tuugii ko e kumpital e hirjino :
- . findinde yimɓe haa paama tanaaji raaɓo ngoo : reenaade memde ɓalli ñawɓe ɓee walla kaɓirɗe ɗe laaɓaani baɗɗe mboros oo ;
- . humpitde yimɓe hulanaaɓe ɓee kam e safrooɓe ɓee. Peewnugol ƴeewndorɗe jaawɗe ine mballa yiytude ñawu nguu law e haɗde daaɓondiral yimɓe. Feso huutortenoongo e kitaale 1970 ine faddoo no moƴƴi ñawu nguu. Pese Mpox kese goɗɗe peewnaama ko ɓooyaani koo.
Mpox/bade waandu ko ñawu kesu, ngidiingu heɓtineede e hitaande 1970 to Konngo. Caggal ɗuum, ngu ɓuri heewde yiyeede ko he dowri e laddeeji nokkuuji leppuɗi Afrik hakkunde walla Afrik hirnaange. Kono ñawu nguu ine tan ɓeydoo saraade caggal dunli Afrik hakkunde, faade laddeeji kuɗooli toowɗi (savane) walla nder teeru, haa e nokkuuji goɗɗi winndere ndee. Dartingol feso bade yimɓe ine jeyaa he ko saabii ngol caragol e kitaale 1980. Kono tan dalillaaji goɗɗi peeñɗi e ɗii duuɓi 30 ɓennuɗi, ine njeyaa heen : maaygol dunli, ɓeydagol teeru, pusgol koɗorɗe kullon ladde. Ɗee geɗe fof ɓeyduɗe jotondiral yimɓe e jawdi, ko golle yimɓe caabii ɗum en. Mbayliigaaji renndo e faggudu, kam e golwole njanti heen, ɓeydi ɗum.
Bookara Aamadu Bah
