Ɓeydagol nguleeki weeyo nana saayna kaaƴe galaas gonɗe to Wuddu-rewo leydi, ine uddita laabi, ine ubbita ngaluuji ubbinooɗi gila ko ɓooyi. Ko ɗuum waɗi heewɓe ine meeranoo toon, maajo konuuji nana toon heewa, pooɗonidire ine ɓeydoo.
To lowlowi wuddu-rewo leydi ceɓɓitiiɗi, kaaƴe galaas nana ŋaƴƴa, ine caaya, ine nguuɗana musiiba ketɗo, he sahaa nde gite fof kucciti he Ikren. Kono ine hulaa hoto wolde ɓurnde mawnude he yonta men oo, hoto ummoraade he ngal boowal moolanaangal, danewal tal, lattiniingal he 21 miliyoŋ km2, wona wolde “laawol sooya ” wudduwol, ngol leyɗe catiiɗe meerotoo sabu kuɓɓam diƴƴe ubbiɗam les galaas.
Wuddu-rewo wonaa Dowla, wonaa doŋre, kono ko kañum tenngii (roondii tenngaade) Leydi, renndini dowlaaji jeetati ɗi njoorndi mum en takkii maaje-galaas : Norwees, Riisi, Kanada, Alaska mo Dental dowlaaji dentuɗi (DDD), Danemarke (haa teeŋti e Groeland lommbiiɗo haa laaɓi he Wuddu-rewo), Islaande, Suwed, e Finlannde. E hitaande 1996, Diiso Wuddu-rewo (Conseil de l’Arctique) sosaa ngam taƴande nokku nguu kuccam. Faandaare Diiso ngoo ko “ummanaade ƴellitaare duumiinde to bannge renndo, faggudu e taariindi Wuddu-rewo”.
Kono so a reenaaki, ko Riisi tan jogori heeroraade ndeen darnde, sabu mum jeyde feccere wertallo wuddu nduu e jogodaade e mum keerol (tufnde) ngol 24 000 km njuuteendi : he feebariyee (colte) 2024, he sahaa pooɗondiral mawngal e Hirnaange, hono wolde Ikren, Riisi yowii junngo mum faade e Diiso Wuddu-rewo.
Leydi ndi Riisi e Siin meerotoo
E hitaande 2014, Riisi naatnii toon konuuji keewɗi, kadi ummanii hesɗitinde tuddule joginoo toon he yonta Sowiyet keewɗe to rewo meetelol wuddu-rewo too, duuɓi capanɗe tati caggal wolde ɓuuɓnde. Ɗuum noon, Keremlen ine anniyii laamaade ngoo wertallo galaas. Waɗi noon ko nokku nguu ine sikkanaa mooftude hedde 160 miliyaar barirgal petroŋ ɗi njiytaaka tawo, e fotde 30% desorɗe winndere ndee to bannge gaas, e tuugnaade e ɓetooji ɗi US Geological Survey waɗi.
Fawtii heen, njaaweeki ɓeydagol nguleeki weeyo he ngal diiwal ine sowoo laabi ɗiɗi njaaweeki mum he nokkuuji goɗɗi ɗii. Ko ngol ɓeydagol nguleeki aaɓni udditgol laabi nder maayo he leyɗe nokku oo. Ɗuum waɗi Riisi ine weltii no feewi he caaygol galaas ngol (pennditagol ɗiƴƴe ngol) sibu ine udditana laaɗe petroŋ walla gaas e laaɗe dimndooje goɗɗe, laabi kesi kisɗi faade Asi. Laawol ndiyam (beforgol) takkingol tufɗe Riisi, ƴaaŋan maa duungel gaas biyeteengel Yamal, tellitii faade Asi rewrude he feɗoode Bering, ko sodorde ustoore fotde 35% njuuteendi e njaru ɗanngal hakkunde Orop e Asi, e wiyde humpitiiɓe. Ko huunde moƴƴunde he Riisi e sahaa mo leyɗe hirnaande pawi kuuge he petroŋ mum e jeeyngu mum.
Caaygol galaas Wuddu-rewo leydi sabu ɓeydagol jaawngol nguleeki weeyo he ngal diiwal, ine waawi udditde ko neeɓaani laabi beforɗi gulli leydi.
Riisi, leydi ngootiri he winndere ndee jogiindi laaɗe gaaluwe kelooje galaas, yaltinii he duuɓi cakkitiiɗi ɗii, laaɗe tati kese baaɗe noon. Gooto e mawɓe Rosatom hollii wonde, he hitaande 2023 ndee, fotde 36 miliyoŋ ton marsandiis ndewrii he ngol laawol. Rosatom ine yaakorii no feewi he laaɗe Siin ngam ɓeydude laabi sappo gostondire njulaagu rewrude he laawol dewrungol fonngo rewo Riisi ngol.
Gila wolde Ikren ummii, Siin ine julodoo no feewi e Riisi, kono jogaaki leydi he diiwal Wuddu-rewo, kadi ine reerɗi he eɓɓaande “Laawol sooya wuddu-rewo” dewrowol rewo Riisi, jokkondiroowol e Orop. Riisi e Siin kadi ine tiiɗtina jokkondire mum en koninkaagu, kadi ina njuɓɓidina sahaa e sahaa fof cofte konu, yeru e sulyee 2023, laaɗe leyɗe ɗiɗi njiydaama saraaji duuɗe alewuute (îles aléoutiennes), saraaji Alaska.
Ɗumm noon haawnaaki so ɗum fooɗtii hakkillaaji leyɗe hirnaange, haa teeŋti e Dolwlaaji dentuɗi, ƴettuɓe feere, gila 2021, ñiiɓnude tuddule konuuji mum to Alaska. Hannde, Alaska ñaddiima njogitaaje keewɗe, yeru baañooje F-35 gonnooɗe Afghanistan.
Riisi e Dental dowlaaji Amerik ɗo njaggondiri he wolde Ikren ɗoo, ine meerondira kadi he powle ɗiɗi feɗoode Bering, ɗo Riisi rewnata gaas mum Yamal diƴƴinaaɗo, faade Asi. He lewru juko ɓennundu nduu tan Amerik faddiima saraaji Alaska laaɗe Riisi TU-95 bommbooje, e laaɗe ɗiɗi Siin H-6. E wiyde ardiiɓe konu Amerik, ko ngool woni go’o ko Riisi e Siin ine ndiwna laaɗe baaɗe nii “he nokku paddorɗo weeyo Alaska”.
Dental dowlaaji ine waɗa he diiwal hee ekkooji konu moolanaaɗi. He lewru seeɗto ɓennundu nduu, jaaynooɓe ciimtii lulnde konu nde hono mawnude meeɗaa waɗde he oo nokku leydi ndii, waɗnde 400 koninke. He lewru juko, diwooje farayse, e amerik, e almaañ, e espaañ, e kanada, mbaɗdii he weeyo Alaska ekkooji diwngo moolanaaɗi.
He innde Otan, Laamaandi-ndentundi neldii baañooje nay F-35B to seɓɓet hirnaange worgo Islannde, ngam oorndaade weeyo Wuddu-rewo, e wiyde jaaynde Newsweek. Maalde ndee ine ñiɓii no feewi he diiwal wuddu-rewo ngal : ko ɓuri heewde e leyɗe nokkuure ndee ko terɗe OTAN, haa teeŋti noon gila Finlannde e Suwed naatii heen. Kono, e fawaade e ɓeto Dental dowlaaji, ñiiɓal ɗoon konu e njulaagu Riisi, ko “huunde woƴnude” no feewi.
Ñalnde 22/08/24
Kuɗol Marie Lombard,
Fulo Bookara Aamadu Bah
————-
* Laawol sooya (Route de la soie) ko laylaytol laabi njulaagu hakkunde Asi e Orop, jokkondirɗi wuro Chang’an (wiyeteengo jooni Xi’an) to Siin e Koostantinoopal (Constantinople) anndiraango hannde Istaambul to Turki. Innde ndee ƴogaa ko geɗal ɓurnongal waawde rewde he ɗiin laabi, so sooya.
* Rosatom ko sosiyatee gaaluwo (nikleyeer) laamu Riisi toppitiiɗo laaɗe kelooje-galaas dampirteeɗe gaaluwe.
