E nder konngol maako ñalnde 6 korse (juin) 2026, Jaagorɗo Pinal e Ñeeñe e Kumpital e Jokkondiral e Sarɗirdu, Jooɓnaaɗo konngol Laamu, hono Huseyn Wul Meddu, wiyi wonde, jomnorgal dawrugol laamu nguu ko semmbe mo Hooreejo leydi oo kam e mawɗo jaagorɗe oo, mbaɗti he ñiiɓgol ɓiyleydaagu. O jokki « faandaare rowrowre denndaangal juɓɓule dawrugol e faggudu ko tiiɗnude ngootaagu ngenndi ndii e toppitaade no moƴƴ keewal pine leydi ndii.
O ɓeydi heen, nde o ardii udditgol mawningol duuɓi 50 cosgol Fedde Ɓamtaare Pulaar he Ndenndaandi Lislaam Muritani, e dow tiitoonde « duuɓi 50 darnde ngam ɓamtaare ɗemɗe ngenndiije e ƴellitgol ndonaandi pinal men », wonde ɗuum ko mawninde cosgol Fedde daraniinde Ƴellitaare walla Guurtingol Pinal Pulaar. O wiyi wonde, wonii feccere teeminannde ko fedde ndee daranii, ko aldaa e dartaade, wallitde tiiɗnugol keewal pine, ñiiɓnugol ɓure koɗdiigu e paamondiral, e tiiɗnugol ɓure ngootaagu ngenndi.
O facciri wonde oo ñalawma ine siftina dumunnaaji laaɓtuɗi daranagol pinal ngenndi ndii, kam e golle ɗe meeɗaa taƴondirde, balluɗe hisnude e anndinnde ndonaandi pinal pulaar, e oon tuma gooto teeŋtini jeyegol mum he yiyaango pinal leydi wootiɗngo, ɗo eddaaji neɗɗaagu ngenndi Muritani kala coomondiri, timmondiri, heen gooto kala ine alɗina goɗɗo oo.
O siftini huunde e keɓe mawɗe leydi ndii to bannge tiiɗnugol neɗɗaagu mum, o teeŋtini wonde ɓiyleydaagu ngu laamu nguu daranii ñiiɓnude nguu, ko darnde ñalnde kala, sabu yenaneede denndugol battane, e paarnoragol jeydagol e ngenndi ngootiri, hurum keewal eddaaji, kisal ndimaagu aadee e jeytoragol moƴƴol he mahngo ngenndi ndii. O siftini wonde nehdi ɓiyleydaagu ine ɓeydoo semmbude tan, ngootaagu ngenndi ine ɓeydoo ñiɓaade. Wonde kadi wonde kellifuya yimɓe fof ine ɗaɓɓi jokkugol golle ngam mahde renndo jaɓɓotoongo, ɓuucoo yimɓe fof, eddaaji fof. O yetti darnde Fedde Ɓamtaare Pulaar sabu darnde mum he nafoore pinal e ndonaandi e ɗemngal.
Fooyre Ɓamtaare