Jam ina tuugii e teddinde jojjanɗe aadee, muñal, kaaldigal, ballondiral e salaade kala mbaydi fitina. Sukaaɓe ina njogii darnde tiiɗnde he mahngo renndo jam, ngootaagu, ballondiral. Ɓe ngoni ko e doole waylo-waylo baawɗe ɓamtude jokkondiral renndo e haɗde fitinaaji nder renndooji.
Waɗde Kaaldigal e Muñal
Sukaaɓe ina poti ardineede kaaldigal ngam safrude luure, hormaade miijooji ceertuɗi, salaade haala ceerndoowa.
Haɓde e fitinaaji
Ɓe poti ko ñiŋde bonanndeeji baɗeteeɗi e ɓalli, e haala, e hakkillaaji, e bonanndeeji goɗɗi e sifaaji mumen fof.
Tiiɗtinde ngootaagu ngenndi e jokkondiral renndo
Sukaaɓe ina mbaawi ɓamtude renndooji ceertuɗi e ƴellitde teddungal, banndiraagal, e jokkondiral jam hakkunde leƴƴi e pine ɗe njiidaa fannuuji.
Haɗde tooñanngeeji bonɗi
Eɓe mbaawi humpitaade e nder banndiraaɓe maɓɓe ko fayti e baɗte majjere, e humambinnaagu.
Huutoraade lowre enternet e dow nuunɗal
Sukaaɓe ina poti haɓaade kabaruuji ɗi ngonaa goonga, jeewte, tooñanngeeji, e mesasuuji cemmbinooji fitinaaji. Ɓe mbaawi huutoraade lowe dijital ngam sarde kabaruuji gaddooji jam, moƴƴinooji renndo
Tawtoreede eɓɓooji renndo
Eɓe mbaawi suusneede e yuɓɓinde hirjinooji gartirooji hakkillaaji hulondiratnooɓe e ɓerɗe hulɓino ndiratnooɓe haa jam duumoo.
Sukaaɓe ina poti tawtoreede kala ko fayti e nguurndam renndo mumen, kanum e wallitde e jiytugol peeje ngam safrude caɗeele renndo.
E nder leydi Moritani, sukaaɓe ina mbaawi wallitde jam e ngootaagu ngenndi so:
• Waɗde jokkondiral ɓurngal tiiɗde hakkunde renndooji ngenndiiji ceertuɗi.
• Humpitaade teddungal keewal pine e coñce.
• Haɓde e añamleñaagu.
• Hirjinde nguurdiigu jam hakkunde hakkunde leƴƴi .
• Haɗde luure jowitiiɗe e ngaluuji e kala ko jiiɓata renndo.
• wiɗtude, bayyina e nder dingiral, jimɗi gaadanteeji e golle pinal.
• Hirjinde naatgol sukaaɓe rewɓe e worɓe e eɓɓooje ɓamtaare.
•paamen kadi, jam fuɗɗotoo ko e teddinde banndiraaɓe.
E tonngol, ciftinen, sukaaɓe ngonaa tan naftortooɓe jam, ko kamɓe ngoni gollotooɓe e mahooɓe ɗum. E nder darnde maɓɓe, e peeje maɓɓe, e hakkillaaji maɓɓe, eɓe mbaawi haɗde luural, haɓaade fitinaaji, e semmbinde jokkondiral enɗe.
Konngol guddirgol : « Sukaaɓe gollotooɓe, Jam duumotooɗo, Muritani Dentuɗo »
Malal Sammba GISE
(jubbannde e loowdi hablo fedde AIDES yuɓɓinannoo sukaaɓe e ballal Booñ Kanadaanaaɓe ngam miijii ɓamtaare.