Batu Kuɓtodinngu Catal Nuwaadibu jooɗiima ñalnde hoyre biir (aset) 15 colte (feebariyee) 2025 ɗo Galle pulaar jooɗorde catal ngal. Ɓe njeewtii heen ko faati e kesɗitingol naatirɗe, caggal nde ciimtol Batu Mooɓondiral 8ɓu fedde ndee waɗaa. Yiilirde yaltoore ndee kadi yettini joɗnde ndee ciimtol golle mum wonande duuɓi nay ɓennuɗi ɗii. Rewi heen ko baylugol yiilirde ndee e geɗe cariiɗe.
Ko yowitii e ciimtol batu mooɓondiral ko Abdul Gey e Raatullaay Sal ngonnoo nelaaɓe catal. Abdul Gey waɗii ciimtol ngol e mbaydi kuuɓal. Yimɓe ɓee keɗtiima ngol no feewi kadi ɓe paamii no haanirta nii.
Ciimtol ndenndaangal golle catal ngal gollii e nder ɗiiɗoo duuɓi nayi ɓennuɗi siimtaama. Sabu kala goomu hooreejo mum rokkaama konngol siimti golle goomu mum gollii ɗee e kuuɓal. Ɗum wonanii terɗe kese ɗee e catal ngal weltaare e nafoore mawnde. Dañii nii wiyɓe meeɗaano sikkudi ko nii golle ɗee mbayi yuɓɓude e feewde. So Geno haajii maa ngar njokkoo.
Ko yowitii e baylugol yiilirde, ko goomu toɗɗaa ngam suɓoyaade yiilirde hesere e tuugnaade e no kuule mbiyri. Caggal ɗum batu ngu hollitaa Goomu nguu jaɓi e kuuɓal. Ko nii Goomu ngu lelorii :
- Sih Jibi Aamel
- Raamatullaay Sal
- Liimaan Sammba Jah
- Abuu Abdul Joob
•Aamadu Saaw
- Caggal nde Goomu nguu joñtoyii, ko leelaani ngu arti, ngu suɓii ndee ɗoo yiilirde jaɓaande e kuuɓal ko aldaa e luulndaare.
Hooreejo teddungal : Abdul Ajiiju Bah
Hooreejo catal : Muusaa Mammadu Bah
Koolaaɗo kuuɓal kalfinaaɗo njuɓɓudi e eddaagu :
Abdullaay Demmba Gey
Kalfinaaɗo kaalis e ngalu : Mammadu Huudu Jaw
Kalfinaaɗo Jaŋde mawɓe e gaggaaji : Raamatullaay Sal
Kalfinaaɗo Pinal : Liimaan Sammba Jah
Kalfinaaɗo Dallinannde e Kumpital : Jibiriiru Aamel Sih
Koroowo ngalu : Abuu Mammadu Jah
Caggal ɗuum, hooreejo Abdul Ajiiju Bah yettinii ngol ɗoo konngol : Ko adii fof ko weltaare e njettoraaji sabu waasde yiyde yolnde e teskaade darnde lomtiiɓe ɓee e timmal, kadi e tiiɗnaare maɓɓe, e diisnagol e kala ko ummanaa.”
He nder cariiɗe wasiyaama, teskaade baasgol yimɓe ɓee nootitaade fedde ndee no haanirta nii, kadi e caɗeele ngalu, yimɓe poti ko yiilaade laabi dañirɗi ngalu mbaasa yowitaade tan e piye. Ɗum foti ko wonde haaju Goomu ngalu.
Wasiyaaji goɗɗi kadi mbaɗaama, peewtuɗi he : - njettoraaji e weltaare fayde e ardiiɓe catal ngal e golle mumen paayodinɗe, e
- eeraango wonande denndaangal ɓesngu fulɓe e ɓesngu Nuwaadibunaaɓe nde nootittoo e catal ngal, kadi ɓe ngara ɓe ngadda ɓesnguuji maɓɓe.
Koolaaɗo kuuɓal, Abdul Gey (Abdullaay Demmba Gey)