Ko ardii fof ko ɓuri 6 000 ɗemngal ine kaalee e winndere ndee, Pulaar jeyaa ko e ɗemɗe 243 ɓurɓe mawnude e winndere ndee, kaandinaaɗe jeyeede heen. Ɗum maa udditan ɗemngal ngal dame keewɗe he nder denndaangal fannuuji nguurndam, gila to bannde ƴellitaare ɗemngal ngal, haa to bannge ganndal e humpital, faggudu, pinal ekn. Sibu kala ko winndaa e ɗeen ɗemɗe 252 mawɗe, ine firoo ɗoon e ɗoon he Pulaar, noon kadi, Pulaar ine firoo he ɗeen ɗemɗe fof ɗoon e ɗoon. Ɗuum firti ko gannde winndere ndee fof keɓiima hankadi he Pulaar :
So en mbaɗii toɓɓere toɓɓere mbiyen, jeyeede he Google Translate (Firirde Google), ine waɗi ɓure keewɗe wonande ɗemngal e haalooɓe ɗum. Limten heen :
- To bannge Kumpital : Haalooɓe pulaar maa mbaaw heɓde denndaangal kabaruuji jaltooji e internet he nder ɗemɗe ɗee kala. Eɗen mbaawi waɗde, fulɓe ceertii e kumpa (wonande waawɓe tarde binndol ɓee kam. Jaaynooɓe men kadi malaama.
- Maa ɗum newnan fulɓe jokkondirde e yimɓe haalooɓe ɗemɗe goɗɗe. Kala ko loowaa e heen ɗemngal gootal, maa heɓo ɗoon e ɗoon he ɗemɗe 253 gonɗe he nder GT ɗee. Maa yimɓe men mbaaw tawtoreede jeewte adunankooje hakkunde ɓe njiidaa ɗemɗe, paatuɗe e geɗe kala. Maa ɗum newnan jaaynooɓe golle mum, sibu maa ɓe mbaaw firde kabaruuji ɗii kala, ɗoon e ɗoon, he ɗemngal pulaar.
- Keɓagol gannde : Eɗen keewnoo woytaade haalooɓe Pulaar ngalaano fartaŋŋe humpitaade gannde, nde tawnoo kañje fof ɗe ngoni ko he ɗemɗe mawɗe ɗee, eɗen mbaawi wiyde ngoon heɗɗaawo yanii hankadi, sibu ko GT firanta en ɗe ɗoon e ɗoon kala heen ko coklu-ɗen e gannde. So en padiino haa annduɓe men pira gannde ɗee he ɗemngal men, maa en njooɗotono ko juuti ɗum laataaki. Kono jooni eɗen mbaawi wiyde gannde ɗee fof ɓadtiima en, yeru demoowo gonɗo too he nder ladde, maa waaw yettaade gannde ndema binndaaɗe he Engele, ballooje ɗum moƴƴinde coñal mum. To bannge jaŋde e ekko, sanɗaaji e jannginooɓe men maa mbaaw huutoraade GT ngam janngude ɗemɗe goɗɗe, ɓe keɓa loowdi jaŋde keewndi e nder ɗemngal maɓɓe neeniwal ngal. Elewaaji maa mbaaw huutoraade GT ngam faamde binndanɗe ganndal gonɗe he engele… ɗuum maa addan ɓe faamde guurɗiwal walla hiisiwal e denndaangal fannuuji goɗɗi ɗi ɓe cokli.
- Maa ɗum wallit firo dokimaaji e lowe internet kam e loowdi ngoɗndi, newna, soñtina jaŋde.
- Kisnugol e ƴellitgol ɗemngal : Naatgol pulaar nder Google Translate maa wallit kisnugol ɗemngal ngal. Maa ɗum newnu keewgol duttorɗe he ɗemgal ngal. Haalooɓe ngal ɓee maa mbaaw huutoraade Google Translate ngam hebbinde defte he pulaar. Pulaar maa ɓur saraade nder Internet.
- Ƴellitaare faggudu e udditgol fartaŋŋeeji : maa fulɓe ɓeydo moƴƴinde gollorɗe mum en faggudu, sibu maa jokkondiral maɓɓe e kiliyaneeɓe maɓɓe ɓeydo newaade, udditana ɓe dame faggudu goɗɗe. Yeru maa ɓe mbaaw firde lowre maɓɓe internet he nder ɗemɗe keewɗe, haa arti noon he engele, sinuwaa, almaa… e fooɗtude kiliyaneeɓe nder winndere ndee kala. Hay wanngotooɓe e ɗannotooɓe maa mbaaw huutoraade GT ngam yillaade nokkuuji men : huunde wallitoore ƴellitde faggudu majji.
- Karalle kese, haa teeŋti noon e karallaagal ɗemɗe : maa ɗum semmbin ƴellitaare karalle kuutorɗe ƴoƴre tafaande (IA) keertoriiɗe Pulaar. Maa ɗum newnu wiɗdo faatungo e ɗemngal ngal kam e peewnugol jaaɓnirɗe (aplikaasiyoŋaaji) tuugniiɗe he Pulaar.
He tonngol, naatgol Pulaar nder GT ine wallita keɓgol e keɓagol geɗe keewɗe, wallita kisal e nguurndam ɗemngal pulaar, ƴellita ɗum, udditana fulɓe dame keewɗe e fartaŋŋeeji keewɗi nder fannuuji keewɗi, gila to bannge nehdi e jaŋde haa to bannge renndo e faggudu.
Bookara Aamadu Bah