Kuulal 8 : Neɗɗo kala ina jogii hakke wullitaade to ñaawirɗe leydi mum so tawii hakkeeji mum njoolaama.
Kuulal 9 : Hay gooto fotaani nanngeede e dow fenaande, sokeede e dow fenaande, walla yaltinireede leydi sabu ɗuum.
Kuulal 10 : Kala tuumaaɗo, ina jogii hakke heɗteede to ñaawirde jaambureere, goonganteere. Ko ndeen ñaawirde tan taƴata ɗooftagol hakkeeji makko walla jaalɗina tuumumuya o.
Kuulal 11
- Kala neɗɗo tuumaaɗo bonannde jaggirtee kono alaa ko waɗi haa nde ñaawoore jaalɗini ɗum e dow hoore mum; tawi noon denndaangal hakkeeji makko jogaade heedooɓe ina ɗooftaa.
- Hay gooto fotaani faweede kuugal sabu golle walla jejji ɗi nganndu-ɗaa nde mbaɗi nde, laawol bonnaano ɗum en (laabi ngenndi maa adunankooji). Ko noon ne kadi, hay kuugal gootal ɓurataa kuugal potnongal faweede e neɗɗo e sahaa nde waɗi bonannde nde.
Kuulal 12 : Nguurndam neɗɗo keeriɗam, nguurndam ɓesngu mum, hoɗorde mum walla binndaaɗe mum, faayiida mum e neɗɗaagu mum, ko geɗe ɗe laawol reeni; hay gooto fotaani naatde heen walla yaɓɓude ɗum maa sunnaade ɗum tawi oon welaaka. Neɗɗo kala ina jogii hakke e ndeenka laawol ngam suurde ɗum e geɗe luulndiiɗe ooɗoo hakke.
Kuulal 13
- Neɗɗo ina jogii hakke yahde ɗo welaa fof, e no weliraa kala, kam e hoɗde e nokku mo welaa e nder leydi.
- Neɗɗo kala ina jogii hakke yaltude leydi mbaawndi wonde fof, fayde leydi ngoɗndi (hay yaltude leydi mum).
Kuulal 14
- Kala kaɗaaɗo deeƴde ina jogii hakke yiylaade e dañde ɗo moolii.
- Oo hakke noon toɗɗaaki yimɓe yiylorteeɗe warhoyre walla golle luulndiiɗe payndaale e piɓle Fedde Ngenndiije Dentuɗe.
Kuulal 15 : Neɗɗo kala ina jogii hakke jeyeede e leydi. Hay gooto waawaa e dow belaaɗe haɗeede jogaade ngenndi walla waylude ngenndi.
Kuulal 16
- Debbo e gorko ina njogii hakke resondirde e waɗde galle so kellifaama. Ɗum alaa paltoor gooto tuugiiɗo e leñol, leydi walla diine. Hakkeeji maɓɓe to bannge dewgal poti e sahaa nde ɓe ngondi nde e nde ɓe ceerata nde.
- Dewgal ngal foti humeede tan ko nde fotɓe resondirde ɓe njaɓi.
- Galle woni ngooroondi renndo, e dow ɗum, renndo e laamu ene poti mo reende.
Kuulal 17 : Neɗɗo kala ina jogii hakke e jeyi, jeyi keeriiɗo walla denndaaɗo.
Kuulal 18 : Kala neɗɗo ina jogii hakke jogaade miijo mum e diine mum. Oo hakke noddii ndimaagu e wellitaare waylude diine walla fiɓnde kam e ndimaagu juulde, so e teelal walla e dental, e peeñɗi walla e ko wirnii Ɗo nodii hakke janngude e tabitinde njuulu makko.
Kuulal 19 : Neɗɗo ina jogii ndimaagu jogaade miijo e diine. Hay gooto fotaani hulɓinireede sabu miijooji mum.
Neɗɗo kala ina waawi yiylaade e dañde e sarde kabaruuji e miijooji e rewrude e kala kuutorgal baawngal wonde kala.
Itaa ko e Hawraande huftodinnde jojjanɗe aadee nde
Doosgal leydi Muritani heptini
Fulo : Bookara Aamadu Bah