Fooyre Ɓamtaare : Mammadu Caam, caggal calminaali ko a baylo, ñeeño wuro, kumpitiiɗo njuɓɓudi maggo haa natti sikke, hol no Wenndiŋ yuɓɓiri to bannge cañu renndo ?
Mammadu Caam : Gelongal Fuuta, caggal calmitaali e duwawuuji moƴƴere feewde e maa, feewde e ardorde Fedde Ɓamtaare Pulaar Muritani e Jaaynde Fooyre Ɓamtaare, mi wiy-maa Wenndiŋ waɗi ko cuuɗi 4 lawakooji piileteeɗi jaaltaaɓe e cuuɗi 5 jaambureeji lamminooji walla piilooji jaaltaaɓe e nder ngoo ɗoo wuro Wenndiŋ.
Fooyre Ɓamtaare : Hol ɗiin cuuɗi kadi wooturu heen fof hol geɗal mum e wuro ngoo ?
Mammadu Caam : Piiletee jaaltaaɓe Wenndiŋ ko worɓe yaltuɓe e Haymuud Sammba. Ɓeen ngoni ɓee ɗoo :
- – Aljum Haymuud
- – Muudo Haymuud
- – Mbañu Haymuud
- – Muuse Haymuud
Eɓe njogii banndiraaɗo debbo gooto ena wiyee Pennda Haymuud. Tesko-ɗen wonde Aljum Haymuud, Muudo Haymuud e Pennda Haymuud njiidi yumma e baaba. Mbañu Haymuud e Muuse Haymuud njiidi kadi yumma e baaba. Tesko-ɗen haa hannde wonde worɓe ɓee, gooto e mumen fof yaltinii suudu :
- – Suudu Aljum Haymuud
- – Suudu Muudo Haymuud
- – Suudu Mbañu Haymuud
- – Suudu Muuse Haymuud
Fooyre Ɓamtaare : jooni, seydi Caam, ɓennan en e cuuɗi jaambureeɓe Wenndiŋ
Mammadu Caam : To bannge jaambureeɓe Wenndiŋ ko ɓe cuuɗi 5 :
- - Suudu Geygeyɓe woni mawɓe jaambureeɓe
- - Suudu Saarɓe woni halfinaaɓe tufnde, jeyɓe maayo
- - Suudu Mboocɓe woni jaagarafeeɓe
- - Suudu Salsalɓe yaltinta elimaneeɓe Baali-Ngoyaa
- - Suudu Woonɓe woni Arɗo Burle
Fooyre Ɓamtaare : Abuu Banngali Ñas, mi salminii ma e innde Fooyre Ɓamtaare, caggal nde keɗti-ɗen Mammadu Caam gila e cuuɗi lawakooji haa e cuuɗi jaambureeji Wenndiŋ, won kelme ɗiɗi walla inɗe ɗiɗi ɗe nan-mi, mboɗo yiɗi laaɓtinaneede ɗe ko adii nde ɓenneten. Ɗeen ngoni Burle e Baali-ngoyaa.
Abuu Banngali Ñas : Mi salmitiima seydi Njaay! Ko a ganndo Fuuta no feewi, teeŋti noon e diiwaan Mbaañ haa e wuro amen Wenndiŋ ngoo. Mboɗo heɓi humpito wonde a naamndoraaki humpeede maa a taw tan ko mbele ɓe ngalaano heen humpito walla ganndal, ena ndaña heen faamamuya. Ɗum noon mbiyen tan Burle e Baali-Ngoyaa ko nokkuuji e nder catiindi Wenndiŋ, ko jeyiiji Woonɓe e Salsalɓe. Woonɓe njeyi Burle, piiletee Arɗo Burle. Salsalɓe njeyi Baali-Ngoyaa, ngoni kadi elimaneeɓe Baali-Ngoyaa.
F.Ɓ. : Seydi Ñas, ɗoo laaɓii cer ! jooni, hol darnde suudu heen fof gila ñamal lefol haa e piilungal Jaaltaaɓe ?
Abuu Banngali Ñas : So lefol diwɗii wonata ko e juuɗe Geygeyɓe, mawɓe jaambureeɓe. Kala e Ñasɓe jiɗɗo ƴamde lefol ngol yahata, ko adii fof, ko to mawɗo Geygeyɓe, o haalana ɗum, o ɓenna e mawɗo Saarɓe kadi o haalana ɗum. O yiya mawɗo Mboocɓe, o ɓenna to mawɓe Burle e Baali-ngoyaa, ɓeen ne o haalana ɗumen. Gooto fof kadi o itta fotde walla woroore, o rokka ɗum ngam mbelnaari. So alaa pooɗondiral, ɓe kawrii kamɓe jaambureeɓe ɓee e fiilde gooto e Ñasɓe, kamɓe fof ɓe ngarat ñalnde heen. Mawɗo Geygeyɓe oo itta lefol, totta gooto e Suudu Muuse Haymuud. Ko e nduun suudu almameeɓe wuro ngoo ngittetee. Oon duwoo e lefol ngol, so gasnii, tottita mo, kanko mawɗo Geygeyɓe oo. Mawɗo Geygeyɓe oo kadi totta lefol ngol mawɗo Mboocɓe. Mawɗo Mboocɓe oo, kañum ne duwoo e maggol, tottita mo, kanko mawɗo Geygeyɓe oo. Mawɗo Geygeyɓe oo totta Almaami raatib wuro ngoo, so ena ɗoon, wiya ceerno kaari duwo heen. So almaami oo duwiima haa gasnii, o heɓa ngol, kanko mawɗo Geygeyɓe oo, o weeɗa ngol hankadi gooto e Mboocɓe, fiila e hoore jaaltaaɓe piileteeɗo oo. So en teskiima ko Geygeyɓe ndokkata lefol kono ko Mboocɓe piilata jaaltaaɓe
F. Ɓ. : Mbele doggol jaaltaɓeeɓe Wenndiŋ, gila e gadano haa e oo ɗoo piilaaɗo hannde 20 morso 2026 ena woodi ?
A. B. Ñ : Doggol jaaltaɓeeɓe Wenndiŋ ena woodi. Oo ɗoo piilaaɗo hannde waɗti jaaltaaɓe 22ɓo :
- 1- Dooro Mbañu Haymuud
- 2- Aamadu Dooro Mbañu
- 3- Daabo Aamadu Dooro
- 4- Aali Daabo
- 5- Bookar Aali Daabo
- 6- Lamiin Aali Daabo
- 7- Demmba Aali Daabo
- 8- Aamadu Aali Daabo
- 9- Sammba Demmba Aali Daabo
- 10- Aamadu Aali Daabo
- 11- Mammadu Lamiin Aali
- 12- Demmba Lamiin Aali Daabo
- 13- Fowru Jawli Jeewo
- 14- Muusaa Huray
- 15- Hammadi Holaa
- 16- Lelel Jaara
- 17- Jubayru
- 18- Balla Usmaan
- 19- Saydu Balla Usmaan
- 20- Aadama Jubayru
- 21- Mammadu Demmba Lamiin lollirɗo Banngali Ñas
- 22- Aamadu Muusaa Pennda
Ko ɗum wonnoo ko pagganno-ɗen banndireeɓe e piilungal Jaaltaaɓe Wenndiŋ ñalnde 20 lewru morso 2026 to Wenndiŋ e Mali Booli
Gelongal Fuuta lollirɗo, Njaay Saydu Aamadu