- Buuɗal yurmeende fuɗii he binnde Geno
- ƴo jam ñallu haa ɗo ciimciinɗi maa kaaɗi
- Jawdi e ɓesngu na carii he ladde, yo yitere maa reen
- Kala ko njiɗ-ɗaa, min coodtirii ɗum biigi e dimaaɗi
- E ƴiiƴam sagataaɓe
- Emin keddii he fiɓnde maa, min pirtataa.
- Min kulataa, min tooñataa, min penataa
- Min ngoofataa, min taƴataa enɗam, min pirtataa aadi
- Kala ko heɓaa ko ko renndaa, ngam ko aan woni Geno
- Mbo renndaaka, joom baɗe e baawɗe, mbo wallaaka
- Piiltiiɗo nano e ñaamo, funnaange e hirnaange
- Jiyoowo, mbo hollaaka
- So niɓre niɓɓii, kulmajje e paaɓi nduka, ndukta
- Jinneeji, e piɗooje,
- e Raatooje ne nduura he dow yamiroore maa
- Koyngal ina he leydi, mboddi endi he leydi
- Alaa ɗo yitere fawii, so wonaa he dow baawɗe maa
- Mi fokkitii, ko mi jahoowo he dow ndeenka maa
- Falo, faddin, heerto, kaɗaa bone
- Heerto, kaɗaa bone bonɓe bonnooɓe tagoore maa
- ƴarooɓe ƴiiƴam, a’ooɓe tooke
- Ko ɓe huɗaaɓe, haɗaaɓe enɗam
- Haalooɓe goonga, gollirooɓe fenaande
- Golle maɓɓe, ko a ceedtiiɗo
- Ñande janngo, ko aan woni ñaawoowo
- Geno bajjo, gooto gontiiɗo he yeeso winndere
- Ko aan woni jurmotooɗo, jaafotooɗo, ñaageteeɗo
- Dokkoowo, timminoowo hoddiro
- ƴ ur mo min, yaafo min, suur min, suuɗ min
- Rewnu min laawol ɓural peewngol,
- Pooccingol, nawrowol min yeeso
- Min ñaagiima ma, jaɓan min. Aamiin !
- Min toriima ma, rokku min. Aamiin !
- Min mooliima ma, daɗndu min. Aamiin !
E kuɗol YUUSUF BAALNDE (to Bordoo) Ndee ɗoo yimre jeaa ko e fannu jime kese e nder ɗemngal pulaar. Nde wallifaa
ko adii fof ko ñande 5/10/1988 to Boke (Koddiwaar). Caggal ɗum nde ɓamtaa to Bordoo (Farayse) ñande 30/03/2001 :