Ciimtol joɗnde mooɓondiral 8ɓal
Ñalnde noogaas e jeetati e noogaas e jeenay bowte (desaambar) 2024, Batu Mooɓondiral njeetaɓu (8ɓu) Fedde Ɓamtaare Pulaar e Muritani (FƁPM) jooɗiima ɗoo he Nuwaasoot. Ginol golle joɗnde ndee e tuugnorgal golle ɗee ko nii siforinoo :
1. Ñalnde aset 28 bowte 2024
- – Udditirgol jaŋde Quraana
- – Konngol hooreejo uddirgol
- – Konngol diisneteeɗo nulaaɗo Jaagordu jaŋde
- – Konnguɗi nulaaɓe cate
- – Jaabawuuli Yiilirde yaltoore
- – Cuɓagol yiilirde mooɓondiral
- – Golle nder goomuuji
2. Ñalnde alet 29 bowte 2024
- – Golle nder goomuuji
- – Toɗɗagol Yiilirde Ngenndi
- – Konngol hooreejo keso
- – uddugol
1. Ñalnde aset 28 bowte 2024:
Mooɓondiral ngal udditi ko waktu 10ɓo e hojomaaji 30. Ngal udditiraa ko jaŋde Quraana. Rewi heen ko konngol udditirgol hooreejo jaltoowo oo, e konngol diisneteeɗo nulaaɗo Jaagordu Jaŋde.
Fotde 200 neɗɗo tawtoraama joɗnde ndee, ine heen diisneteeɓe ɗiɗo jaagordu jaŋde, Gardo Duɗal Ɓamtaare e Jaŋde Ɗemɗe Ngenndiije (IPELAN), hooreeɓe teddungal fedde ndee, e teddiniraaɓe joɗnde ndee kam e nulaaɓe ummoriiɓe e cate 20 nder cate 29 fedde ndee. Caggal nde golle ɗee njowaa seeɗa mbele bismaaɓe ɓee ina mbaawa yaltude, jeyaaɓe he mooɓondiral ngal ƴettiti golle ngam heɗaade konnguɗi nulaaɓe cate : Suwoyraat, Nuwaadibu, Nuwaasoot (El Miina, Daar Nayiim, Daarel Beyda, Sebka, Arafaat), Baabaaɓe, Kayhayɗi, Jowol, Raybaani/Erkiis, Jinkeere/Faraa Liitaama, Sehilbaabi, Kiifa, Calgu, Sahre Ndoogu, Seyyen Gababe, Fonndu, Haayre Mbaar, Barkewol. Caggal nde ciimti ɗii njoofi, joɗnde ndee yowaa e w15 e hojomaaji 40, mbele yimɓe ɓee ngottoo.
Golle ɗee ƴettiti e w16 e hojomaaji 20, yiilirde yaltoore laaɓɓitini huunde e toɓɓe seedantaagal mum, jaabtii kadi teskuyaaji e naamne ɗe nulaaɓe cate ɗee njettinnoo. Caggal ɗum huccanaa toɗɗagol Yiilirde fotnde ɗowde golle mooɓondiral 8ɓal FƁPM, siforiinde nii :
- • Hooreejo : Daawuuda Abdullay Dem (Goomu dallinannde);
- • Ciimtoowo : Mammadu Haasi Mbay (Yiilirde yaltoore);
•Terɗe :
- – Raki Usmaan Camara (Catal Daarel Beyda) ;
- – Mammadu Aamadu Kan (Catal Suwoyraat) ;
- – Saanun Alasan Sal (Catal Baabaaɓe).
Tawanooɓe joɗnde ndee poɓɓi kelle ngam hollude njaɓii yiilirde ndee. Nii woni nde yaaɓani ɗoon e ɗoon feccitaade tawaaɓe ɓee e nder goomuuji 3 golle : Goomu Kuccam (DOPS), Goomu Doosɗe e kawraaɗe, Goomu eɓɓaaɗe.
Goomu Kuccam :
- – Hooreejo : Usmaan Ñaan (Hooreejo catal Kayhayɗi);
- – Ciimtoowo : Muhammed Abdarahmaan Sal (Hooreejo Catal El Mina);
Goomu Doosɗe :
- – Hooreejo : Abdul Gey (Catal Nuwaadibu);
- – Ciimtoowo : Rugi Demmba Bah (El Miina);
- Goomu eɓɓaaɗe :
- – Hooreejo : Faati Bubakar Jallo (Daarel Beyda);
- – Ciimtoowo : Mammadu Abuu Jah (Catal Fonndu);
Ɗoon e ɗoon goomuuji ɗii kuccani golle, ɗi ngoni heen haa waktu 22 e hojomaaji 20.
2. Ñalnde alet 29 bowte 2019 :
Golle njokki nder goomuuji haa w14 e hojomaaji 10. Caggal nde terɗe mooɓondiral ngal pooftii fotde hojomaaji 40 ngam juulde e wottaade, ɓe ƴettiti golle ngam heɗaade ciimti goomuuji ɗii ngartiri ɗii.
Caggal nde ɗe njaɓraa caatgol kelle, hawraaɗe jeeɗiɗi (7) kollitanooɗe ɗee njaɓaa kam enne : Hawraande duwanagol terɗe fedde ndee cankiiɗe, hawraande kuɓtodingol jaŋde ɗemɗe ngenndiije pulaar, sooninke e wolof, hawraande laawɗingol ɗemɗe ngenndiije, hawraande faatunde e mahngo galle fedde, hawraande faatunde e jaŋde gaggaaji, hawraande faatunde e jaŋde yahdinaande e golle njeñu, e duɗe ƴaaɓorɗe, e hawraande njettoor faade e Goomu njuɓɓudi mooɓondiral.
Caggal ɗuum, e dow sakkitoore yiilirde yaltunde ndee, Goomu toɗɗotoongu Yiilirde hesere hollitaa woote joɗnde ndee. Ko nii ngu lelorii :
- – Malal Sammba Gise
- – Faati Bubakar Jallo
- – Abdul Kudduus Jallo
- – Abdulaay Malal Bah
- – Mammadu Abdul Jallo.
Ngu foɓɓanaa, ngu joñoyii. Caggal ɗuum ngu sakkiti batu nguu ndee ɗoo yiilirde hesere :
l HOOREEƁE TEDDUNGAL : (Batu nguu waylaani ɓe)
- 1. Umar Mammadu lollirɗo Sileymaani Kan
- 2. Mammadu Siley Bah
- 3. Umar Idiriisa Saawo
- 4. Dr Alhuseyni Jah
- 5. Aamadu Umar Jah
- 6. Usmaan Maamuudu Kan
- 7. Sammba Joom Bah
- 8. Hammadi Sukki Mbooc
l YIILIRDE NGENNDI :
- 1. Hooreejo: Bookara Aamadu Bah
- 2. Cukko hooreejo kalfinaaɗo heblo : Mammadu Haasi Mbay
- 3. Koolaaɗo Kuuɓal kalfinaaɗo njuɓɓudi e eddaagu Alasan Aamadu Sal
- 4. Cukko K. Kuuɓal kalfinaaɗo njuɓɓudi e eddaagu Faatimata Sammba Joop
- 5. Kalfinaaɗo Jaŋde mawɓe e gaggaaji e ɓiyleydaagu Mammadu Njobbo Jah
- 6. Koolaaɗo Kumpital e Dallinannde Abu Aamadu Kan
- 7. Kalfinaaɗo Kaalis e Ngalu Aamadu Tijiaani Sih
- 8. Koroowo Njuɓɓudi e Ngalu Raki Usmaan Kamara
- 9. Kalfinaaɗo Pinal Aysata Aamadu Bah
Ndee Yiilirde ngenndiire wootanaa, rokki ndii ɗoo njeñtudi :
- – Jaɓɓe : 156 daande
- – Saliiɓe : 0 daande
- – Jaambureeɓe: 0 daande
- – Luutaaɓe : 27 daande
Caggal ɗuum yiilirde joɗnde ndee tellii, yiilirde hesere ndee jooɗii, hooreejo keso oo ƴetti ngardiigu golle ɗee. E nder konngol daɓɓol o jaari denndaangal arɓe mooɓondiral ngal sabu teddungal ndokki ɓe ngal, kanko e denndaangal terɗe yiilirde hesere ndee. O limti huunde e geɗe keñoraaɗe, o hunii waɗde kala ko o waawi, mbele, e ballal Alla, paandaale kese fedde ndee ina laatoo.
Ko ɗoo Mooɓondiral jeetaɓal (8ɓal) Fedde Ɓamtaare Pulaar he Muritani ƴeesiraa waktu 22 e hojomaaji 15 caggal hiraande maantinnde.
Waɗaa ko Nuwaasoot ñalnde 29 bowte 2024.
