ko ñalnde 6 e 7 silto 2026 wonnoo ñalɗi pinal Ɗalhaya e jeejogol nder wuro Ɗalhaya tawi heɓli ɗum en ko Goomu Pinal Ɗalhaya e gardagol Aadama Haamiidu Aaw. Ñalnde 6 ndee, subaka oo, ko seppo e ƴaro baali dawraa. Udditi golle ɗee caggal deftere Geno teddunde ndee ko gardiiɗo tunndu Ɗalhaya woni Abuu Alhajji Jah, Bismiiɗo hoɗɓe arɓe ɓee.
Nde yahi wonaa haa gayniraa ƴaro baali ko jippunde faytaa. Ko ɗoon ñameele ganni ngaddaa hono: Ñihri bunaa e kodde gawri e kodde ñebbe, ɗee ndakkee ngawlee, ɗee ndakkee muuɗee.
Nde yahi haa hiiri ko yeewtere Ceerno Njaay Saydu hirndoraa, tawi woni tiitoonde ndee ko « darnde sagata he nder renndo mum ». Yeewtere ndee yuɓɓii, tee nde rewii laawol tawi ina duusa nde Goomu pinal Ɗalhaya , e Abuu Hammee Jaak lollirɗo Laru mo Jowol sahre, Jibi Muusa Soh mo Bedenki Dooro Kudiyel mo likseyba Qaalii Abdulaay Sal mo Likseyba, Aliw Lamine Njaay mo Siñtu Buubu makka, Maalik Kuñnjo mo Siñtu Buubu Makka. Goomu pinal Maafoondu, Goomu pinal Likseyba. Tawi omo takkondiri e Aamadu Dulo Soh gorko mo Maafoondu.
Nde yahi haa jamma ko yeewtere nafoore jaŋde ɗemɗe ngenndiije nde Aamadu Dulo Soh huufani ɓesngu Ɗalhaya e nootiiɓe ɗum. Refti heen ko tinndinooje kam e jime pattamlame.
Ñalawma 07 silto oo ko jalluɗi ceeɓndam dawraa tawi ina ɗowa naamne ɗee Qaali Abdullaay Sal gorko mo LIkseyba gural Yero. Ina tonngi ñalawmaa oo wejo ganni kam e kuutorɗe ñeeñaagu.
Nde yahi haa hiiri, hirndoraa ko ñaaƴo pucci puuɗaaɗi, kaarɗi cuɗiraaɗi kaɓirɗe mbaɗɗu kam e waɗɗiyankooɓe ŋanaa ɓe mbonnaa pucci, ina duusa ɓe goomu pinal Ɗalhaya.
Kono dee tokkiti ɗii ñalɗi dow, ko lammba njirwuka, njirwinaaka, coomka njeenaaje liɓɗo e liɓaaɗo. Tawi ko kommbaaji tati ceertuɗi ciiri, sabu ko kommbaa sukaaɓe adoraa, refti heen kommba mawnasɓe, sakkitoraa ko kommbaa sagataaɓe mawɓe. Sahaa kala wooda purliiɗo he leydi, gulaali ngulla.
Ina tawtoraa ɗii ñalɗi pattamlami jogiiɗi wune, debbo njamndi hono Jeynaba Abuu Bah, debbo mo Siñtaan Njaakiri wuro nayi e gooleeje woɗɗaa Ɗalhaya e jeejeengo.
Ñalɗi ɗii ndewii laawol, ɗi ngonii ñalɗi kaalteteeɗi sabu ɗi ndañii wune, sabu ko wayrunoo waɗii he nder so toɓde haa beeli e karaaje tuɗa. Keccol nanngondiri ina uura.
Aamadu Dulo Soh