Ndillee, ndillee ! Ɓoyii haaleede, winndaama haa tampaama : fooftere heewnde moƴƴaani e cellal, joɗnde juutnde moƴƴaani e cellal. Heewnoo wiyeede ko yo neɗɗo duumo e coftal ɓalli, walla duumoo e yahndaade ñalnde fof hay so hojomaji seeɗa, so dañaama hojom 30 ñalawma kala. Jooni kadi, won wiɗtooɓe newni golle kadi : “ won ɗeen golle nder galle, hay so ko hojom walla ɗiɗi haa tati, ina mbaawi lomtaade 30 basiyanooɗi ɗii ”. Teskaama ɗuum ina usta ñawbuuli ɓernde e ɗaɗi ƴiiƴam, jabet, ngudu, taasiyoŋ…
Hono no porfeseer Brad Cardinal to Duɗal Jaaɓi-haaɗtirde Oregon to Dental Dowlaaji Amerik wiyiri nii. “ joopaa ɗoo ko coftal ɓalli newingal, tuugingal e golle ñalnde kala, ɓeydaa seeɗa yahdu walla dille. Waɗde coftal ɓalli jahdungal e nguurndam e golle neɗɗo, ɓuri newaade e yahde to boowal coftal ɓalli ”. Yeru, ɗee ɗoo geɗe :
- So aɗa golloo e nokku baɗɗo taakaw, ŋabbiraa koyɗe, mbaasaa ƴettude masin ŋabbinoowo ;
- So a jolii e kaar aɗa fayi nokku, njippo-ɗaa so a faandiima, njokkitiraa yolnde heddiinde ndee koyɗe ;
- Teddinaa gollaaɗe nder galle…
- Yahrude jolɗe dabɓe fof koyɗe ;
- So a wottiima walla a hirtiima, yahndo ;
- So aɗa haala e telefoŋ, aɗa waawi yahde aɗa arta e nder nokku ngon-ɗaa oo, ɓuri jooɗaade ɗo gootel.
Bookara Aamadu Bah