Musiɗɗo Kurkoori ina wiyee Nduudoori saŋkiima. Ko o gorko ligganinooɗo aduna. O dañiino jawdi haa heewi. Kono ko noon o wayi yiɗde, worɗude e tiiɗde junngo. O lelii o sellaani, o faayi o woni ko e ruttaade e Joom makko. O noddi jom-suudu makko Banel e musiɗɗo mum ina wiyee Mintu, o wiyi ɓe: “So mi maayii, alaa ko niɗ-mi so wonaa yo a ƴeftu ceede am (kaalis) fof ubbidee e am… Mintu, ko aan woni seede am aduna e laakara”. Banel wiyi jaɓii ko o haali ko, hay sinno ɗum welaani mo. Ɓooytaani, o saŋkii. Nduudoori lootaa, fawaa e goski, rewɓe e sukaaɓe ina iiwnoo ina ngoya. Banel ñaagii yo o woppe o yahda e maɓɓe baamuule ngati won ko o fodannoo jom-galle makko. O yahdi e musiɗɗo makko Mintu. O juulaa, ɓe ƴefti mo ɓe mbaɗi mo e qabiri makko. Nde ɓe mbiyi aɓe ngartira e makko leydi, Banel ñaagii yo ɓe muñan ɗum. O yaltini talkuro ina sowaa, ina haɓɓaa haa tiiɗi, o waɗi e qabiri he, ubbidaa e Nduudoori. Ɓe ummitii baamuule ɓe ngarti wuro. Mintu ñuumbanii Banel, o wiyi mo :
- Aan kam Banel, ko mbaɗ-ɗaa e qabiri ko, mbar wonaa ceede e kaŋŋe dey. Ma a taw kay a haangaaka. Aɗa anndi kay maayɗo alaa ko waɗata kaŋŋe e kaalis. ɓonaa sabu a fodaniino mo ɗum tan, aɗa ƴefta jawdi aɗa ubba e leydi. Banel jali wiyi :
- Hey Mintu ! Aɗa anndi kay mi haangaaka. Kono kala ko podanmi neɗɗo mi waɗat, saka noon e jom-galle am garɗo e kommbol maayde. Mi siifanii mo “shek” teemedere miliyoŋ kaalis men, mi waɗii e qabiri makko, mbele so o tawii toon baŋke ma o waaw heɓde ceede.
Aamadu Malal Gey