Ñalnde alarba 14 deesaamburu (bowte) ko ñalawma pattamlamo he nder Siñcu Ɗeyba, sabu ko ñalawma gudditgol ɗoon duɗal entaaɓe (Jardin d’enfants). Ngoon wuro jeyaango e Booso to diiwanuuji Fuuta. Kono ko wuro jeyaango e komin Neere Waalo. Ngo juulata ko e Sillaa rewo. Ngoon wuro e Koppe mum biyeteeɗe Ɓamtaare Siñcu Ɗeyba, dañii fartaŋŋe mahde duɗal entaaɓe, tawi ko e ballal fedde wiyeteende ASP (Association solidarité et progrès). Ndeen fedde jooɗiinde to Farayse, e gardagol Aamadu Tijjaani Njaay jeyaaɗo to Siñcu Bumak.
Ndeen fedde sosaa ko 2014. Gila ndeen nde seeraani e wallitde diiwaan oo, ko wayi no Siñcu Bumak laabi limtinɗi, Beelinaaɓe laabi ɗiɗi. E ngolɗoo laawol ko Siñcu Ɗeyba yontaa. Ɓe keɓii fartaŋŋe mahde duɗal, ngal cuuɗi ɗiɗi (biro, caali e keblorɗe ɗiɗi) wondude e pijirlooji sukaaɓe jonɗi, ko wayi no jaayorɗe, peesirɗe… Njaru ɗeen golle tolnoyiima e miliyoŋaaji nay pawɗi (kaalis kiiɗɗo o). Tawi to bannge peeje e njuɓɓudi eɓe mballondiri e Meeri diiwaan Neere Waalo e gardiiɗo ɗum Abdu Elimaan Accee. Caggal nde golle ɗee njoofi, kanko Aamadu Tijjaani Njaay gardiiɗo A. S. P., o heɓii arde yiyde golle ɗee e tawtoreede udditgol ngal duɗal ngal.
Oon ñalawma, hoohooɓe diiwaan Gorgol heewɓe tawtoraama, ko wayi no haakem Kahayɗi, Meer Komin Neere Waalo haa e jooɗaniiɓe Jaagorgal toppitiingal geɗe renndo, cukaaku e ndewaldi (MASEF). Konnguɗi paayodinɗi kaalaama toon, tawi ko cemmbinooji nehdi e sawndaade cukalon tokoson ko adii nde naatoyta duɗe, mbele wallita ɗumen e peertugol hakkillaaji. Perfee Kahayɗi oo kadi semmbinii ɗanniyankooɓe diiwaan oo nde njokkata he ɗee golle paayodinɗe, ɗe ɗanniyanke fof foti waɗande leydi mum, diiwaan mum e wuro mum.
Daawuuda Sammba Ndonngo