Wonnoo ɗoo ko fowru e bojel e rawaandu.
Ina wona, wonataa ko tinndol
Fowru e bojel ina nder ladde, rawaandu tawi ɓe toon. Rawaandu woni e yeewtande ɓe ñaameele wuro belɗe.
- Fowru e bojel mbiyi : “Hol ko weli toon?”
- Rawaandu wiyi : “ Naamde ina toon, ina wiyee kodde. ”
- Fowru wiyi : “Hol no kodde mbayi ? ”
- Rawaandu wiyi : “Kodde ndakketee ko subaka, kono heewi ñaameede ko kikiiɗe ”
- Fowru wiyi : “ Sifono mi no kodde mbayi.»
- Rawaandu wiyi “Kodde ina rawni, ko gawri sottetee haa laaɓa, saaño kоo ittee, unee haa ɗaata, waɗee booɗe ɓooee.»
Ngool laawol, rawaandu haalanaani fowru do kodde mooftetee. Hiiri. Fowru ari e wuro, tawi jinnde ndoondi, sikki ko kodde. Fowru muudi haa reedu heewi ndoondi, tan
- fowru arti wiyi : “Bojel, mi muudii kodde hanki jamma ! ”
- Bojel wiyi :” Eehee ! Haa Rawaandu ara, mi naamnoo ɗum taw ko kodde muuddaa. ”
Weeti. Rawaandu ari.
- Bojel wiyi : “ Rawaandu, Fowru dey wiyi muudii kodde hanki ! Rawaandu wiyi : “ Fowru, hol to taw-ɗaa kodde ɗee ? ”
- Fowru wiyi : “ Taw-mi kodde ɗee ko sara caggal wuro, ina weddaa e jinnde, muud-mi heen haa kaar-mi. ”
- Rawaandu wiyi : “ Alaa. Ɗuum wonaa kodde, ko ndoondi. Hay gooto yiɗaa. To kodde ngonata too, so a yahii toon, so a artii, kulle fof nganndat a ñaamii kodde, walla a yettiima ɗo ɗe ngoni. ”
- Fowru wiyi : “Hol to kodde ngoni ? »
- Rawaandu wiyi : “ So a naatii e galle, njahataa ko nder suudu, kooyno-ɗaa dow, ma a yiy daggal, walla kaggu ma a yiy koron ɗiɗon: ngel ina waɗi kosam, ngela ina waɗi kodde; ma a yiy heen ñeddude : njowtaa korel kosam ngel, e korel kodde ngel, e ñeddude ndee ; yeɓtaa kosam ɗam, mbaylaa e kodde hee, nirkiraa ñedude ndee haa ɗaata, tan njaraa haa kaaraa. Ɗuum woni kodde. ”
Tan fowru acci haa futuro juulaa, yahi wuro. Fowru ari naati galle, fayi nder suudu, ƴettii, yiyi ɗaggal, ndu hooynii ɗaggal ngal. Ndeke joom kodde ɗee ina nder suudu : o yiyi fowru nduu. O yeɓtii ɓannde…
O yiyi fowru naatii suudu. Fowru tinaani. Fowru ƴeeŋii ina yowta koron kon, tan korel kosam ngel rufi e hoore fowru ! Joom kodde ɗee addi ɓannde fiyi kine fowru pat ! Tan hinere fowru fusi, ƴiiƴam werlii, ñiiƴe ɗee keli, tan cosorɗi ƴiiƴam mberlii, tan fowru dogi faati to bojel, hoore mum ina moddi kosam, hunuko mum ina silsilta ƴiiƴam ! Fowru yettii bojel. Bojel ndaari fowru, hoore ndee ina moddi kosam, hinere ndee ina feecii, ƴiiƴam ina siimta.
Bojel wiyi : “ Heehee ! Kaawu fowru, hay so a yaraani kodde dey, a yettiima ɗo kodde ngoni ɗoo !
Ndiwaa ɗoo, dakkaa ɗoo !