Hare rafi sidaa woppittaake tan e safrooɓe hay pelle pine ina poti daraade ngam haɓaade o rafi boonɗo bonnoowo nde hay gooto anndaa ɗo bonannde mum haaɗi. Duum tagi goomu ngatamaare catal (Fedde Ɓamtaare Pulaar Moritani) Nuwaadibu yuɓɓinde hiirde pinal ngam haɓaade rafi sidaa ñalde Aset 12/05/07 to galle FƁPM catal Nuwaadibu.
Arii tawtoreede hiirde nde yoga e pelle pine e pelle gure e huunde e hoohooɓe tedduɓe diiwaan o. Ko noon ko ɓuri heewde e naalankooɓe e yimiyankooɓe pulaar wuro ngo nootitiima e hiirde nde ngaddii balle mumen haa timmi.
Fedde ƴellitaare yuɓɓinii jimol paytungol e rafi sidaa. Golle ɗe ko hono nii lelorii:1.Adii fof ko konngol udditirgol tawi ko hooreejo catal ngal hono Kan Aamadu Saydu bismii denndaagal arnooɓe tawtoreede hiirde nde.
Caggal duum ko garanɗo fedde haɓotoonde rafi sidaa ƴefti konngol.
- Jimol paytungol e rafi sidaa ngol ɗiɗɗal goomu ngatamaare waɗi ngam udditde hiirde nde.
- Njalniika paytuka e rafi sidaa yuɓɓin ɗum ko terɗe goomu o.
- Jalluɗi ceeɓndam hakkunde seengoji ɗiɗi A e B naamne ɗe njowitii ko e rafi sidaa.
- Njalniika paytuka e rafi sidaa yuɓɓini dum ko terɗe fedde nde.
- Naalanke Aamadu Bah lollirɗo Pastel Bah waɗii heen golle baɗɗe faayida.
- Hiirde nde uddiraa ko jimol njaaren fedde ɓamtaare pulaar e daaɗe sukaaɓe yimiyankooɓe fedde nde.
Eɗen njetta denndaagal terɗe goomu o ngam darnde e golle maɓɓe.
Abuu Kan Nuwaadibu