Seydi’en, onon goomu “Fooyre Ɓamtaare” Mbeɗe weltii e ndee jaaynde nde njaltinton ko ina tolnoo hannde e duuɓi ɗiɗi, gila e loowdi mayre haa e ŋari mayre. Mbeɗe anndi doole e softeende sete mon pawii tan ko e yarlitaare mon. Mbeɗe muuyaa ɗoo yettude on sabu horma ndokku-ɗon yarlitaare mon e darnde mon feewde ƴellitaare demɗe men ngenndiije.
Mbeɗe hoofnoo on kadi sabu ndee yarlitaare tagnde haa mbaaw-ɗon yeñtinde, mbaaw-ɗon bayyinde, mbaaw-ɗon duumnude ngal kuutorgal ɓamtaare. Darnde mon ina foti ɗofteede, gila e laamuuji diiwaan o, haa heɓi teelɗuɓe yarlitiiɓe. Caggal ɗuum, mbeɗe sakkita on ɗii wasiyaaji ɗi njaakorii-mi ko ballitooji ƴellito jaaynde nde :
Ɗo adan ɗoo, ina moƴƴa nde keblaton e kala toŋngoode, nokku ballitoowo humaaɓe e binndi e jaŋde Pulaar, mbele aɓe etoo humtaade, ɓe ekkoo seeɗseeɗa jaŋngude ɗemngal ngal e winndude ngal e faamde ko winndiraa ngal. Keblee binndannɗe ballitooje ɓee yimɓe, ngati aɓe keewi sanne.
Geɗel ɗiɗmel ngel fayti ko e fooɗtude sukaaɓe, mbele aɓe ekkoo law huutoraade ɗemngal Pulaar. To oon bannge, mbeɗe sikki heblude hay so ko feƴtere hello ko yowitii e « ciifol natangol » (bande dessinée) ina walla ; yowitoo e tinndi men e daari men, kewe renndo men, walla daartol, ekn… ɗee geɗe ina mbaawi wallitde sukaaɓe men yiytaade heen e yiytude donaaɗi men e goowaaɗi men, mawninde korsa maɓɓe e koye maɓɓe, ɓe njiytoo heen, ɓe kooloo heen koye maɓɓe…
To wattan, mbeɗe wasiyoo on nde kollitton nder kala toŋngoode no jaŋngiyaŋke waɗata so ina yiɗi wallitde on (gila e ngalu haa e binndanɗe), ina heen jamminooje mon laaɓtuɗe. Mbeɗe yaakorii maa ɗii wasiyaaji mballit on. Seydi’en, onon goomu Fooyre Ɓamtaare, yo Alla sellin doole. Ummoraade e Faama Aan Gonɗo hannde to New York (USA) Fooyre Ɓamtaare :
Tesko : So Alla jaɓii ma en tesko ɗiiɗoo wasiyaaji teeŋtuɗi e tonngooɗe men garooje. Eɗen njetta Faama Aan, sabu wasiyaaji makko nawrooji yeeso.
