Ɓataake teddungal e musiɗɗaagu feewde e hooreejo goomu kumpital jaaynde Fooyre Ɓamtaare, hono Bookara Aamadu Bah
Miɗo salmina on, miɗo juuroo on. Oo ɗoo ɓataake onon musidɓe daraniiɓe wuurnude e laynude e ɗemngal Pulaar rewrude e binndi jaaynde winndaande, yo Alla yottin payndaale ! Miɗo anndina on min ngartii ɗoo e leydi Muritani, ñalnde alkamiisa 10/10/2009. Min ngoni ko ɗo wiyetee Jeyi Baaba Wuro Dooro, renndo dowri Faraa Liitaama, falnde Magaama, diiwaan Kayhayɗi. Ko min galleeji joy, coomɗi 51 neɗɗo. E min njiɗi janngude Pulaar e jannginirde Pulaar. E min njiɗi heɓde jaaynde men Fooyre Ɓamtaare, kala tonngooɗe yaltunde. Caggal nde njanngu-mi tonngooɗe men ɓooyɗe, mi heɓii coftal kesal ngam faayiida gonɗo heen oo. Tonngoode 52 marsa 2008, tonngoode 82 siilo 2011, tonngoode 83 colte 2011 e tonngoode 86 mee 2011. Ɗum rokkii kam pellital addude ballal ɗee ɗoo tonngooɗe fof keɓ-mi ɗum ko e junngo jooɗaniiɗo jaaynde ndee ɗoo e sahre Magaama, hono Salli Sakke Sih, mo ñaamataa hakke. To bannge coftal jangde Pulaar amin njogii ɗoo e wuro hee jannginooɓe Pulaar 14 suka, amin njanngina limto, hijjo, taro kelme, e konngi. To bannge caɗeele amen teeŋtuɗe ko min ngarti, ko tawtude gese amen ina ngonti leɗɗe, etee laamu o wiyi min ko yamiroore alaa yo lewe. So neɗɗo lewii ko ɓuri famɗude fof maa yoɓ 200 000 mbuuɗu. Mi yowa ɗoo haa waawtungo woɗngo. Yo en ngon e jam.
