Caggal nde njanngu-mi jaaynde men Fooyre Ɓamtaare tonngooɗe 87 yaltunde e lewru korse hitaande 2011, miɗo adda ballal am e hello 6, tiitoonde Aynooɓe e ngaynaaka e ngaynaandi.
Miɗo uddita ɗoo damal kaalowal ñawbuuli nayi e safaruuji mum en. Jargo nayi buunaaji jamma, cayeeji weetndoogo, kamatine aljanna, kampaaji dewle fulɓe. So ɗi ndawa ɗi ɗaccir ma gooleejе ina njeewtu ma, so ɗi njoftii ɗi ngartiran ma keddam (kosam). So ɗi ndawii e ladde ɗi ndidda ndawuuuji, ɗi purtina biinaaji lelli, ɗi tikkina ɓiɗkon keeɗe. Bakane kaalis ñallooje e ladde. So ɗi mbiiɗnanii ma ngesa maaɗa keewaa gawri, so ɗi mbonnanii ma ngesa maaɗa, mbaasaa gawri. “ Ɗi mbaali ko wuro amen, ɓuri ɗi mbaali ko gese amen ”.
Naamne e jaaynde men Fooyre Ɓamtaare tonngooɗe 86 lewru mee 2011 e hello 5. On peeñninii heen winndannde ganndal koode, miɗo wiya on : Ko haalaa e ganndal koode e kaawisaaji mum koo haaldotaako sabu ngoɗɗeeki to ɗe ngoni too e nguleeki ki naange jogii kii e njaajeendi e teddeendi majje kañje tagooje ɗe kaal-ɗon ɗee. Ɗiin kaawisaaji fof e waasde faameede, a min njiɗi jubbaneede e kaawisaaji e tagandeeji caabotooɗi toɓo. Miɗo jogii naamne ɗe kuccitinatmi e goomu wiɗto e ɓulngo e fulo Fooyre Ɓamtaare :
- Hol ko waɗi e leyɗe men hirnaange Afrik fof toɓo ndunngu iwrata ɗum ko fuɗnaange maa worgo ?
- Hol ko tagi majje ina ciirtoo e sahaa nde yiiwoonde udditi toɓo ?
- Hol ko tagi diiraali kulɓiniiɗi ina mbaɗa e nder heen, yiyee jaynge ruppitoo haa suma cuuɗi wara jawdi, booma yimɓe ? 4.
- Hol ko waɗi ngeen jaynge huɓɓnuge ndiyam ñifataa ɗum ?
E kudol Muusaa Mammadu lollirɗo
Coftuɗo Bah to Jeybaaba wuro Dooro (44 9182 ɓ5)
—————–
Jaabtagol ɓataake Muusaa Mammadu
A jaaraama e ɓataake maa keewɗo faayiida оо. Wonande winndannde neldu-ɗaa ndee, haaloore ko faati ñawbuuli nayi, ma en nduttano nde so en njoofnii winndannde ngaynaaka loow-ɗen gila e tonngooɗe ɗiɗi ɓennuɗe ɗee. Wonande naamnal maa gadanal ngal, eɗen ɗaɓɓiri kala banndiraaɗo jogiiɗo heen humpito nde neldata en jaabawol. Wonande naamne diɗmal e tatabal ngal, eɗen mbiya mo, yo о rutto e tonngooɗe 81 yaltunoonde e lewru oktoobar 2010 wonande majje e manaango e digaali. Wonande naamnal cakkitiingal ngal kadi, kala jogiiɗo haala ina waawi winndude en, njaltinen ɗum e tonngooɗe garooje.
Fooyre Ɓamtaare
