Jaaynde wiyeteende Forbes waɗii wiɗto ngam anndude rewɓe teemedere ɓurɓe heewde doole e nder winndere nde.
Heedi yeeso, ko mawɗo leydi Almaañ, hono debbo biyeteeɗo Anjelaa Merkel, jibinaaɗo ñalnde 17 suwee 1954 to Hammbuur.
Oo debbo jeyaa ko e parti politik biyetee- ɗo Dental Demokaraasi Keretiyee (Union Chrétienne Démocrate). Kanko woni debbo gadano gardiiɗo leydi Almaañ. Anjelaa Merkel ko ganndo. Tuggude 1961 haa 1971 o janngii e ekkol politeknik. Ko o fanniyanke ko fayti e ganndal hiisa (matematik), tee omo jogii doktoraa e Ɓalliwal mo o heɓi e hitaande 1986.
Rewi e makko ko Konndoleesaa Raayse : oo ɗoo debbo ɓaleejo jeyaa ko e fewjooɓe ina pirta to Dental leyɗe Amerik. Rawane kanko wonnoo hoore rewɓe ɓurɓe heewde doole, hikka o wontii ɗiɗmo caggal nde Merkel toɗaa yo won mawɗo leydi Almaañ. O jibinaa ko 1954 to Birminngaam to dowla Alabama. O wonii Diisneteeɗo ko fayti e geɗe kisal ngenndi (Conseillère à la Sécurité nationale) Sorse Buus, tuggi 2001 haa 2005. Gila saawiyee 2005 ko o Kuuɓal Dowla Dental Leyɗe Amerik. Raayse naati Uniwersitee Denweer (Denwer) ko ina yahra e duuɓi 15 fat. Ko ɗoon o janngi ko fayti e Gannde Dawrugol. O heɓi heen seedantaagal biyeteengal Bachelor e wondude e tiitoonde summa cum laude. O jannginii Gannde Dawrugol e nder Uniwersitee Stanford. O halfinaama poostooji politik keewɗi hade makko lomtaade, ñande 16 noowammbar 2004, Kolin Powel gonnooɗo Kuuɓal Dowla. Senaa Amerik ŋirriimo e oo poosto ko e lewru saawiyee 2005 e nder woote mo o gañii daaɗe ‘‘85 eey’’ e daaɗe ‘‘13 alaa’’ : ngol woni go’o ko debbo ɓaleejo ina jooɗoo e o palaas.
Woni tataɓo ko sinuwaa biyeteeɗo Wu Yi. Ko o cukko mawɗo hilifaaɓe Diiso Dowla Denndaandi Ɓesngu leydi Shiin. O jibinaa ko diiwaan Wuhan e lewru noowammbar 1938.
Bookara Aamadu Bah
