Leydi Senegaal waɗii taabal mawngal feewde e ɗemɗe ngenndiije. Hooreejo leydi ndii hono Makki Sal yamirii kuutoragol ɗemɗe 6 ngenndiije to Suudu Sarɗiyeeji. Ɗeen ngoni Pulaar, Seereer, Sooninke, Wolof, Joolaa e Mandinka. Hankadi gooto fof ena jogii ndimaagu haalde e ɗemngal mum neeniwal walla ngal waawi tawi ndaardetaake yitere kutuya walla ngañgu. Hay firo ngoo arata ko e ɗemɗe neeniije toɗɗaaɗe ɗee. Muumɓe ɓee e koye mum en ena ndaɗɗanaa peeje ngam nantineede. Tawi ko adii ɗum, o yamirii, kanko mawɗo leydi ndii yo ɗemngal Pulaar e ɗemngal wolof mbaɗtu janngeede e nder duɗe laamu gila e hitaande 2013. Ndeke hannde oo, Seek Anta Joop, Aamadu Maalik Gay, Yero Dooro Jallo, Seek Faadel Kan e Alhajji Tijjaani Aan walla e kala maaynooɗo ena yahdi e ngoƴa ɓamtaare ɗemɗe to Senegaal, maa ndeeƴtu e nder janaale mum en sabu aawdi ndi ɓe ngaawnoo waɗii ɓesnooje, ɓesngu Senegaal fuɗɗiima naftoraade.
- Advertisment -