25 marse « wonande min, minen baayeeji ɗii, nguuɗoo ñalngu wonaa ñalngu beldital »: konngol Laamtooro Kamara Bayeeji kewkewe 1986/1989 mawninii, nder sunaare, ñalawma 25 marse oo.
Ɗum waɗi ko to joɗnde COVIRE e tawtoreede baayeeji ɗii e rewɓe hesniiɓe ɓee. Ko ɗoon Laamtooro Kamara haali konngol mbinndu-ɗen dow ngol.
E wiyde makko kadi, guwarnama Muritani e hooreejo leydi oo, hono Muhammed Abdel Asiis, njahiino haa Kayhayɗi ngam juulde e waranooɓe ndeen ɓee, kono, o waɗaani ko o wiynoo ndeen koo, so ñawndude batte ndonaari aadeeri.
“Nanondiral ngal o siifdi e rewɓe hesniiɓe ɓee ko fuunti. Ko o rokki ngam lomtinande waranaaɓe ɓee kam e loranooɓe ɓee, alaa no foti, yanti heen sariya 1993 jaafiiɗo warnooɓe koye ɓee ina haɗi ɓeen ñaaweede, eɓe njaha e haajuuji maɓɓe, tee min nganndaa haa hannde ɗo baabiraaɓe amen ubbaa, baabiraaɓe amen maayɓe ina ngollanoo leydi ndii, haa teeŋti noon e wolde Saharaa”.
O jokki, kanko Laamtooro Kamara, baaye jahroowo hannde e duuɓi 31, wonde laamu nguu ina jokki e nooynaade hujjaaji maɓɓe, kamɓe e denndaangal pelle daraniiɗe jojjanɗe waranooɓe e kewkewe 86/91, kamɓe fof e yuɓɓinde seppooji e diinnooji keewɗi. O holliti ñalnde heen wonde ɗaɓɓaande maɓɓe ko yo laamu nguu sos “goomu ngenndiiwu, njaam- bureewu, potngu toppoitaade ñawndugol warhoore baɗ- nooɗo e Muritani, les njiimaandi laamu wul Taaya”, sariyaa jaafotooɗo warkoyeeɓe oo firtee mbele ɓeen ina mbaawa ñaaweede, sibu “ko kamɓe tan mbaawi yaafaade, hay gooto waawaa haalde ɗoon e innde maɓɓe”.
