Ñalaande lekki, hol lekki ? Aawre leɗɗe gam moƴƴitinde ladde ! Hol ko addunoo ndogen saka ndarto-ɗen ?
Ndeenen leɗɗe men ɗe taariindi men ndii fuɗnani hoyre mum ɗee. Ko no hay reenɓe ladde (oose-fooreeɓe) ɓee ina njeeya leɗɗe ɗe feƴƴooɓe yo peƴɗu e dowu jamiroore laamu ! Ruttee kadi wiyee yo leɗɗe ngaawe, tee ɗeen gaaweteeɗe ko leɗɗe jiggoyaaɗe to weeyooji ɗi nanndaani e weeyo men.
Ko haɗi en etaade aawtaade leɗɗe men, leɗɗe taariindi men ɗee, jahduɗe e weeyo men ngoo, sabu lekkuuje men ɗee ko lekkuule mawɗe, ɓuuɓɗe, ɓesnooje baɗooje luurooji koɗna ñaaki, ndañen heen njuumri – leɗɗe men ko guurnooje jawdi, guurnooje ndiwri.
Hay janal (leɗɗe janɗe ) ɗee so ngaccaama ɗoon leydi saggat heen haa heewa, so toɓii fuɗa huɗo, fuɗta leɗɗe, ɗuum fof ko he geɗe guurtinooje ladde.
Ladde wayi tan ko no hunuko nii, toppitaade ñiiƴe mum hoto colde, ɓuri welsindaande ñiiƴe ɗee haa cola, wonta e waɗtude ñiiƴe goɗɗe.
Eɗeni majjina koye men e aduna hee : eɗeni ngaddoya nayi – beyi – baali caggal leydi, eɗen mbaylira ɗum jawdi leydi men adan ndii, tawa noon tampere neɗɗo tampata he nehgol ndiin jawdi ittoyaandi caggal leydi, so tampii feccere ɗuum he jawdi men ndii tan, dañat heen hono ko dañata he jawdi iwdi caggal leydi ndii.
Leɗɗe ɗee ne ko noon tan, ɗeen leɗɗe janane ɗe ngaawtoto-ɗen he leyɗeele men ɗee, e ndiin jawdi njananndi ndi nehtoto-ɗen, en njaɓ wonande ɗi maccuɓe tan, ɗi njaɓi coñtude.
Idiriisa Kah (facebook)
Lekki – lekɗe he Senegaal e Afirik
