Wonnoo ɗoo ko rawaandu.
Ndu tawi duulalɗe ɗiɗi ina kaɓa. Ndu ari e puccu, ndu wiyi : « Puccu, duulalɗe ɗiɗi nana kaɓa, a yahataa ceerndaa ɗe ! » Puccu wiyi : « Miɗa jiimi e gammbu am miɗa ñaama, mi yaha hare duulalɗe ? Ko wondii kam e ɗuum ? » Rawaandu wiyi : « Bone dey ficcat laaci ! »
Rawaandu ɓenni, ari e ngori, ina wiɗoo. Ndu wiyi : « Ngori, duulaaɗe ɗiɗi nana kaɓa, a yahataa ceerndaa ɗe ? » Ngori wiyi : « Hol miin e yahde hare duulalɗe ? Ɗuum dey wonaa haaju am ! » Rawaandu wiyi : « Bone dey ficcat laaci !… »
Rawaandu ɓenni, ari e njawdi. Ndu wiyi : « Njawdi, duulalɗe ɗiɗi nana kaɓa. A yaahataa ceerndaa ɗe ? » Njawdi wiyi : « Miɗa ñaama gooƴi am, yo mi yah hare duulalɗe ? Yo ɗe mbarondir ! » Rawaandu wiyi : « Bone dey ficcat laaci !… »
Rawaandu ɓenni, ari e ngaari. Ndu wiyi : « Ngaari, duulalɗe ɗiɗi nana kaɓa. A yaahataa ceerndaa ɗe ? » Ngaari wiyi : « Miɗa ñaama ñaayko am, yo mi seerndoy hare duulalɗe ? Ummo ɗoon dey ! » Rawaandu wiyi : « Bone dey ficcat laaci !… »
Duulalɗe cippiri haa njani e jige debbo nayeejo. Jige oo ina waɗi wiro. Laaceeje ɗee nawori wiro koo. Ɗe njani e jaaynge, ɗe ŋabbi e suudu. Suudu debbo nayeejo wonnoo nduu sumi. Debbo oo maayi. Gullaali ngulli, yimɓe mbii : « Kaɓɓee puccu nguu, ƴeewon cukalel wulloyoo banndiraaɓe. »
Puccu seŋaa labungal. Rawaandu ari e puccu, ndu wiyi : « Puccu, mi wiyiino ma bone ficcat laaci. Hannde so ɓe ceertii e maa, so a maayaani ne, a tampat. » Puccu ñalli dogneede e gure, arti tan maayi, daasaa werlaa caggal wuro. Rawaandu ñaami. Hoɗɓe ngari janayse. Yimɓe mbiyi : « Ƴeewanee hoɓɓe ɓee ko ñaami. » Ɓe mbii : « Mbaree ngori oo ». Tan sukaaɓe mbiyaa yoo paɗɗu ngori. Ɓe ƴefti cabbi, ɓe ndewi e ngori. Ngori ina doga, ina naata e cuuɗi e ndallaaji. Rawaandu wiyi : « Ngori, mi wiyiino ma bone ficcat laaci. Oo bone luutataa ma. » Ngori waraa ñaamaa, ƴiye mum mberlaa rawaandu. Hiiri. Yimɓe mbii : « Ƴeewanee hoɓɓe ko kiirtii. » Ɓe mbiyi : « Mbaree njawdi ndii. » Njawdi nanngaa ina waree. Rawaandu ari e njawdi. Ndu wiyi : « Mi wiyiino ma bone ficcat laaci. Aan kam a daɗataa. » Njawdi waraa ñaamaa, ƴiye mum mberlaa. Rawaandu ñaami. Ñawli. Ɓe mbiyi : « Ƴeewanee hoɓɓe ko ngottii. » Yimɓe mbiyi : « Mbaree ngaari ndii. » Ngaari jaggaa, haɓɓaa ina waree. Rawaandu ari wiyi : « Ngaari, mi wiyiino ma bone ficcan laaci. Oo bone luutaani ma. » Ngaari waraa ñaamaa, ƴiye mum mberlaa rawaandu. Ɗum noon dey, yo Alla daɗndu en bone. Kala jiyɗo bone ina ƴeñee, yo harto.
