Fooyre Ɓamtaare yilliima Galle Ñeeñɗuɓe hono Iisa Baal e ɓiyum Umaar Baal, ɓe nganndu-ɗaa ko natgoobuyankooɓe, ɓe wejooji mum en limtilimtiɗi ceeraani e waɗeede e nokkuuji pine keewɗi, e nder Moritani kam e caggal Moritani kala. Ɓe ngollotoo ko e leegal Basra.
En njilliima ɓe e nder huɓeere maɓɓe mawnde taakaw, ngal mbaydi naykiɓɓal, nokku mo nganndu-ɗaa alluuje keewɗe nataaɗe ina Rarɗini ɗum. Ko ɗoon kadi laboratuwaar maɓɓe porteleeje woni. En ngarii toon ngam anndude holi kamɓe, hol ko ɓe ngollata e oo nokku ? Jokkondiral gadanal ngal mbaɗdu-ɗen ɗum ko e Iisa Baal (natal 1) gardiiɗo nokku o, ndeftin-ɗen heen ko Umaar Baal (natal 2) hono ɓiyiiko. Yuɓɓinani en jokkondiral ngal ko Daawuuda Bah kam Mammadu Maamuudu Baal
Fooyre ɓamtaare (F.Ɓ.) : Anndin min hoyre maa ?
Iisa Baal : Mbiyatee-mi ko Iisa Baal, njibinaa-mi ko e 1953 to Baabaaɓe looti. Ko mi potoowo, kadi ko mi natboobuyanke (dessinateur peintre). Mi naataani lekkon ñeeñiyankaagal, mi janngaani lekkon Farayse walla Arab haa ngoɗɗoy-mi.
F .Ɓ. : Hol nde puɗɗi-ɗaa e wejo ?
Iisa Baal : Puɗɗii-mi wejo ko e 1979, to galle Pine Ngenndi (Musée national). Mbiɗo yiɗi nato, kono mi waɗaani ɗum gollal. Ko Mammadu Kabaa Aan duñi mi heen… Caggal mum, mi jooɗiima ko juuti mi wejaani. 7amtu-mi ɗum ko e 1997. Ko miin e ɓiyi am mbaɗdata wejooji. Min mbejii laabi keewɗi to galle pinal Farayse (C.C.F), kam e Santar pinal Maruk
F.Ɓ. : Mbele won ɓe mbaɗdataa wejooji ɗi ?
Iisa Baal :Keew-mi wejdude ko e ɓiyi am hono Umaar Baal, emin kawrita e wejiyankooɓe woɗɓe Muritaninaaɓe.
F .Ɓ. : Hol no njaggir-ɗaa gollal ngal, kam e gollooɓe ɗum ɓe?
Iisa Baal : Ko gollal hono no golle ɗee fof nii, ina wuurna, ina holtina, ina safra. Mi mahii heen, mi dañii heen, jettooɗe ngoodanii Alla… So mi yiyii goɗɗo ina golla ɗum, ina ɓeydana mi cuusal e caasal. Kadi mbiɗo waasiyoo heen joom mum nde darantoo ɗum sanne tiiɗnoo heen sanne. Mbiɗo wasiyoo ɓe nde ɓe mbaɗtata e mum (ñeeñal ngal) hakkillaaji maɓɓe, sibu ko pinal ngal gooto fof foti waɗtude heen hakkille mum; so yiɗii tawa ko moorooɓe, maa sañooɓe, maa ɗatooɓe, walla waylooɓe, ko yo gooto fof waɗtu heen hakkille mum.
F .Ɓ. :Hol ko keew-ɗaa wejde?
Iisa Baal : Keew-mi wejde ko natgoobuuji cuuɗi tibaaji, laaɗe, rewɓe fulɓe ina nguna, maa walla ina mbammbi, maa ina ɓira nayi. Mbiɗo weja kadi nate nayi, ɓeyi, baali, kam e gese. Mbiɗo weja kadi nate sippirooji bawɗi; ɗum fof ko ngam anndinde pinal fulɓe, e mawninde ɗum e hollitde ɗum lecci goɗɗi…
F .Ɓ. : Hol wasiya maa e ɓesngu ngu?
Iisa Baal : Wasiya am ko yo ɓe tiiɗno e pinal ngal, ɓe ƴellita ɗemngal ngal,ɓe mawnina ñeeñal ngal, ɓe cuusna ñeeñɗuɓe men.
Daawuuda Bah e Mammadu Maamuudu Baal
