Duɗal Baaba leñol to Beelinaaɓe woni ko e Fedde rewɓe e worɓe ɓesngu Beelinaaɓe. Duuɓi keewɗi ndeeɗoo fedde ina darii laŋ ngam haɓde e humambinnaagal e majjere. Nde jannginii ɗemngal pulaar, nde kirjinii, nde ɓamtii rewɓe to bannge renndo e faggudu. Ko ndeeɗoo fedde jibini fedde ADEFREM (Deental ngam Ƴellitaare Rewɓe Dowri Muritani) e gardagol Maryam Mammdu Aan. Gila 2021ADEFREM ine gollodoo e fedde nde wonaa laamu wiyeteende ASP (Deental Ballondiral e Ɓamtaare) e gardagol Aamadu Tijjaani Njaay he nder eɓɓoore yowitiinde e mahgol nokku jaŋde ngam haɓde e humambinnaagal e gollinde sukaaɓe rewɓe roofolɓe e fannu renndo e faggudu. Ko Ceerno Njaay jooɗanii Fedde nde e diiwaan hee.
Mahde duɗal karallaagal ngam heblude sukaaɓe e fannuuji keewɗi e gardagol Mayram Mammadu Aan lollirɗo Mayram Daddaa ngam haɓde e hummambinnaagal. Jaale mawɗe ina tammbii golle ɗee ko wayi no Abdul Kader Aan e Ibraahiima Aan. Mahdi ndii woɗɗoyii e ooɗo sahaa, heddii tan ko peewnugol ɓoggi kuuraa e gaddugol kaɓirɗe walla pentiir. ASP fuɗɗiima addude jooɗorɗe e taabe. Golle ɗee njooɗii peewii.
Njuuteendi nokku oo 45m, njaajeendi makko ko 25m. Ɗum noon geɗe goɗɗe ina mbaawi waɗeede heen. E ooɗo sahaa ko ɗumɗoo waɗaa heen: suudu heblo, suudu gollordu, suudu njeeygu, suudu masiŋ gunoowo, keblorɗe, ɓalal taartaarol. Ko adii ɗum ASP mahaniino ɓe cuuɗi ɗiɗi e caali. Ɓe ngaddii masiŋ gunoowo. E hitaande 2022, ɓe mbaɗi suudu peewnugol caabune, ɓe njuɓɓinii heblooji ko feewti horo e fannu ɗowngo fedde e faggudu.
Ñalnde Alkamiisa 29 ut, fedde ADEFREM mbismiima Catal FƁPM Kayhayɗi ngam teddinirde ɗum ko dañaa koo e tawteede jooɗaniiɗo ASP he diiwaan oo, hono Hammee Baaba Njaay ɓurɗo lollirde Ceerno Njaay, suka coftuɗo. O siimtanii ɓe gollondiral hakkunde ASP e fedde ADEFREM, o jaarii darnde rewɓe Beelinaaɓe e tiiɗnaare mumen, o wiyi ASP ina heɓtini golle maɓɓe, kadi ina yiɗi duusde ɓe haa yeeso. Nokku oo hannde ko keɓtinaaɗo to bannge laamu.
Usmaan Ñaan Kayhayɗi
