Ɓowde ko wuro fulɓe aynaaɓe dariingo hirnaange Ɓoggee e dow laawol godoron tiindingol Rooso. Ɓowde darii ko e jeerí, Ŋoral Gidaala heedi ɗum e maayo, ɓe ndenndi gese, caaɗli, cehe e durnirɗi nde wonde kamɓe fof ko ɓe iwdi ngootiri : soowanaaɓе.
Ñalnde alet 17 lewru settammburu, agaaɓе baali wuro Ɓowde ndawri ko yuɓɓinde ƴaro e nder wuro hee. Ƴaro noon so oɗon ciftora heewnoo waɗeede ko e hitaande yajeende, wonande fulɓe aynaaɓe tawa toɓo toɓii haa heewi, durngo dañaama, jawdi haarii, kosam heewii. Ɗeen maale fof hikka njiyaama e nder nguu ɗoo ndunngu ngarngu e sahaa katojinaaɗo, tawde wonii jawdi taccii ɗoo fatara bonɗo e nder ceeɗu hee. Nde wonde ndunngu rawane toɓaani ilaani, jawdi e yimɓe fof lorlii e nguu ɗoo ceeɗu. Yoga e Ɓowdenaaɓe ko oordunooɓe e jawdi tacci maayo, njahi haa e nder ferlo.
Hikka noon hitaande artaani bannɗum, ko ɗum waɗi sukaaɓе agaaɓе ɓowdenaaɓe pelliti waɗde ƴaro baali, e nder ɗuum ɓe eerii yoga e gure hoɗdiibе mаɓɓe nde ngarata tawtoree. Nii woni ko wayi no Daara Salaam en, Hamdallaahi en, Ŋoral Gidaala, Ciɗee, Ceenel, fulɓe e yoga e gure safalɓe catiiɗe (Daar el Afiya, Roymbel ekn..) alaa luutaaɗo.
Kewu nguu fuɗɗii ko e saanga beetawe, aynaaɓe jeytoranooɓe e ƴaro ngoo fof curi baali mum en e saraaji wuro hee, haa nde yamiroore rokkaa yo fuɗɗe, aynaaɓe cortii, kalhali cukki e mum en, jawdi keddiindi ndii rewi heen. Kamɓe fof ɓe lommbii e laawol godoron peccitngol wuro Ɓowde, ɓe keedti ɗum e otooji ummiiɗi Ɓoggee maa Rooso. Leelaani, ɓe loowi mbeddaaji wuro ngoo, punndi ruuki, boombi e seemedɓe ñaantiiɓe ina cacci, caati ɓe kelle e kuljinaali. Heddii ko heen gaynaako fof ina hollira gaatuleeje mbele baali. mum en ina ndefta heen : ɓee ndiwa galleeji, naata e nder cuuɗi, taaroo wuro, baali ɓurɗi heen jolde fof ñemtinta ko gaynaako mum en waɗi koo. Ko noon wooraa haa naange darii e hoore, tawi sukkaaɓe rewɓe keblii puukri mum en, ndakkii kodde, ndefii maaroji e ñiheeje mum en, e tewu ngam wottinde hobɓе nootitinooɓe e ƴaro hee. Ñalnde heen noon mbaarudi ŋakkaani sabu kala gaynaako ƴarinooɗo, joldaaɗo heen fof nanngii dammuhol hirsani tawtoraaɓe kewu nguu. Bottaaje ngottaa, atayuuji e tufameeje njaraa e nder ñalnde welemma, gooto fof ina siimta hol no yiyiri ñalawma oo.
Ɓowde hollirii wonde fulɓe ina njogii pijirlooji ganni baawɗi wuurtineede hannde, njanta e pijirlooji yonta hannde oo ko wayi no pijirlooji bal e fannuuji mum kala, jiidaani e mogooji, naalankaagal keewɗi yuɓɓineede e sahaaji guurte elewaaji. Ƴaro noon ko goonga ko fijirde sukaaɓe kono kadi ko ɓeto golle sabu ko e oon sahaa anndetee hol gaynaako ɓurnooɗo toppitaade jawdi mum, ɓurɗo waawde faynude jawdi e nehde ɗum, ɗum ina ɓeyda martaba gaynaako.
Jeytoraaɓe e oo ɗoo kewu ko ɓee ɗoo agaаɓе Aali Giisel Bah, Saydu Aamadu Deh, Aamadu Faama Soh, Aamadu Yagga Bah, Jibi Seydi Bah, Aamadu Hawo Deh, Aamadu Mammadu, Hammoo Soh, Aamadu Mammadu Jallo et Aliw Aamadu Bah.
Limtani en nguu ɗoo kewu ko Aamadu Saydu Deh e Mammadu Demmba Deh ɗoo e Nuwaasoot.
