Wonande ɓe nganndaano, ngam siftinde kadi anndunooɓe, Ahmed Ben Bellaa jeyaa ko e ƴettunooɓe fetel ngam haɓde e njiimaandi koloñaal Farayse. Nde Alaseri heɓi hoore mum e hitaande 1962, kanko waɗaa hooreejo leydi, ko ɗum tagi innde makko yahdineede e cosgol dowla oo.
Huunde haawniinde, so en mbiyaama wonde ko Farayse holli ownooɓe hannde feere jiiltugol laaɗe diwooje : ñalnde 22 oktoobar 1956 Farayse yiilti laana ndiwoowa njolnunooka Ahmed Ben Bellaa (ina wondi e ardiiɓe FLN woɗɓe, hono Ayte Ahmed e Bujaaf), umminooɓe Maruk ina payi Tuunus. Ben Ballaa noon ardii Alaseri tan ko laaɓti, ko tuggude sulyee 1962 (jeytaare Alaseri) haa 19 suwee 1965 (nde Waari Bumejeen waɗata mo kuudetaa ndee). Ndeen o jaggaama, o mooftaa ɗo suuɗii, caggal ɗum o nawtaa galle makko o fawaa yitere. Ko perdisaa Shaadli Ben Jadiid woppiti mo e hitaande 1980.
Caggal ɗuum o daayi fotde duuɓi jeenay (9). Ahmed Ben Bellaa arti Alaseri ko e settaambar 1989, o sosi parti makko, kono ɗeɓaani heɓtineede. Hay so tawii oon parti, caggal nde heɓtinaa, alaano doole no feewi, kanko kam omo heɗananoo no feewi. O luulndinooma niilnugol woote desammbar 1991, caabinongol hare ƴiiƴiire FIS ummini caggal ɗuum e leydi hee. Abdel Asiis Butefliika, nde ardii leydi ndii, ina heewnoo diisnondirde e makko ngam anndude miijo makko e heɓde wasiyaaji makko.
Bookara Aamadu Bah
