Fedde Ngenndiije Dentuɗe (F.NG.D) siftinii nafoore ɗemngal e keewal eddaaji
8 settaambar : ñalawma jaŋde mawɓe : « Nafoore ɗemngal e keewal eddaaji »
Fedde NGenndiije Dentuɗe mawninii, ñalnde alet 8 settaambar 2019 « Ñalawma winndereejo jaŋde mawɓe ». Ɗum wonii fartaŋŋe siftinde wonde jannginde mawɓe jeyaa ko e ndimaagu e hakkeeji aadee, ko ngooroondi wellitaare neɗɗo kam e ƴellitaare huuɓtodinnde, duumotoonde.
Hikka, tiitoonde Ñalawma oo ko « Jaŋde mawɓe e keewal ɗemɗe » ngam miijtaade e nafoore rowrowre ɗemngal, kam e keewal ɗemɗe wonande neɗɗo e renndo. E siftinde wonde hay so tawii won ko waɗaa ko heewi, caɗeele janngingol mawɓe ina lutti woodde, kono ɗe ngonaa goote e nder leyɗe ɗee e renndooji ɗii. E wiyde FNGD, teskagol keewal ɗemɗe nder ƴellitgol nehdi e jaŋde e jaŋde mawɓe, ko geɗal jojjungal ngam waawde yahdude e yonta hannde kaa, ɗo keewal ɗemɗe ɓeydotoo yaajde wondude e yah-ngartaaji yimɓe ɓurɗi heewde.
Keewal ɗemɗe ina wallitira renndooji ɗii ɓamtaade sibu ina wallita gondigal e ƴellitagol pine keewɗe, kam e jiyle ceertuɗe aduna e tippuɗe ganndal. E ngal maantini kadi nder yimɓe joñaaɓe, hulanaaɓe majjude.
Ñalawma winndereejo jaŋde mawɓe ina mawninee e nder winndere hee kala ñalnde 8 settaambar. Ñalnde heen ko fartaŋŋe renndinde laamuuji e renndo siwil e denndaangal gollooɓe woƴaaɓe ɓee. Miijo waɗande jaŋde mawɓe ñalawma keeriiɗo jibinaa ko e joɗnde mooɓondiral jaagorɗe kalfinaaɗe Nehdi e Jaŋde e mumtugol humambinnaagu, jooɗinoongal to Teheraa to Iraan, e lewru settaambar 1965.
Jaŋde mawɓe jeyaa ko e geɗe dowrowe Tuugnorgal ƴellitaare duumiinde ɗoo e 2030 kam e paandaale mum. Paandaale ƴellitaare duumiinde ngardini ko keɓgol yimɓe fof jaŋde moƴƴere, tawi ko e potal, kam e dañde no janngiri kala nde yiɗi e nder nguurndam mum. Wootere e toɓɓanɗe faandaare 4 ko waɗtude hakkille, ɗoo e 2030, mbele « sukaaɓe ɓee fof kam e keeweendi moƴƴiri mawɓe ɓee, rewɓe e worɓe fof, ina mbaawa tarde, winndude e hiisaade ».
Bookara Aamadu Bah
