Aliko Danngotee woni Afriknaajo ɓurɗo alɗude e ɗiiɗoo duuɓi (gila 2015 haa 2019). Omo tawree fotde miliyaruuji 10 dolaar. Oon Aliko Danngotee tawtoraama joɗnde ɗaɓɓirde mballudi feɗde Bil & Melinndaa Geyti (Bill & Melinda Gates), feɗde walloore fannuuji keewɗi he winndere ndee. E ndeeɗoon joɗnde kanko Aliko Danngotee o hokkii ɓe miliyoŋaaji 20 dolaar mballudi.
Ngalɗoon dokkal woni ballal gadanal ngal galo Afiriknaajo walli feɗde dowlaaji dennduɗi daraniinde wallude talkaaɓe e boomaaɓe he winndere ndee.
He joɗnde Bil & Melinda Geyte waɗnde ñallal 24 siilto toonto New York, nde wonanii yimɓe daraniiɓe ngurndam feɗde ndee ñalawma maantiniiɗo mbo yejjitaake. Aliko Danngotee kay ne yettii, mani feɗde Bil & Melinda Geyte no feewi, taweede balle makko ne njettoo yimɓe heewɓe ɓe o jiidaa hay huunde, haa teeŋti e nder leydi Najeriyaa, o hollii maa o jokku wallude pelle daraniiɗe talkaaɓe. Ine e eɓɓooje makko waɗde ko ɓuri heewde e jawdi makko e ɗeen pelle njurumdeere.
Bil Geyte hollii e haala mum wonde, nde ɓe cosatnoo fedde maɓɓe ndee e hitaande 1994, ɓe njiyaano ɗiiɗoo fannuuji ɗi ɓe potatnoo waawde wallude e geɗe cellal.
Aliko Danngote kay ne wiyi so haalde goonga, jokkondiral hakkunde mum he feɗde Njurum Bil & Melinndaa Geyte ndee feertii gite mum, anndinii ɗum laabi keewɗi balleteeɗi e fannu cellal. O wiyi ndeen nde o yiydaano e Bil Geyte ndee, o tuumiino mbo wonde neɗɗo tiiɗɗo. Kono nde o yiyi mo ndee o waylii yiyannde makko. Bil ko neɗɗo ceertuɗo e men enen afiriknaaɓe, maa walla mbiyen Najeriyanaaɓe « ko o neɗɗo baɗoowo jawdi mum e wonki mum e yurmaade kala fannu mbo yimɓe kaani yurmoreede, ɗum ko huunde bettunde » mo. O jokki heen « miin Aliko Danngotee mi sikkiino Bil ko neɗɗo mettuɗo faamrude, kono, caggal ko njiy-moo-mi koo, mi tawii Bil ko neɗɗo jankiniiɗo, mi tawii ko o neɗɗo lesɗuɗo konngol, jarlitiiɗo haa ɗoon haaɗi ; heɓde hono Bil he winndere hee wanaa ko weeɓi, miin Aliko Dangotee e yahdiiɓe am, min njiyii laawol ngol men njiɗi waawde ñemmbude eko arata, mbele mi heɓa waɗde e ko ɓuri jaalaade e ngalu am he ɗiin laabi Njurumndeeru.
Mammadu Aamadu Bah (Kucaala)
