Ardinooɓe HAPA toɗɗitaama yo njokku ɗowde golle oo nokku ñalnde 9 suwee 2008. ɗum ko sabu moƴƴinde ɓe golle maɓɓe e daawal ɓennungal ngal. ɗum noon, enen ne eɗen njanta e Muritaninaaɓe kala ngam yettude ɓe e golle maɓɓe e nuunɗal maɓɓe, sibu enen kala eɗen nganndi wonde ko ɓe kalfinaa ko gollal caɗtungal : go’o, ko jooni jaayɗe puɗɗii welliteede ; ɗiɗi, hakilantaagal jaayndiyankooɓe Muritaninaaɓe weeɓaani yuɓɓinde.
Ina jeyaa e golle maantinde ɗe ɓe ɗowi : yuɓɓinde e rewindaade peccitagol waktuuji jeeyngal wonande partiiji politik e kanndidaaji e woote gardagol leydi ɓennuɗe ɗe ; suɓtaade jaayɗe binndaaɗe kaanduɗe e ballal laamu (e nder 600 jaaynde ko 37 tan kuuɓni heen sarɗiiji dottanooɗi ɗi).
E ko fayi arde golle maɓɓe maa ɓeydo saɗtude sibu huccanaa ko bellitgol jaayɗe nanɗe-jiyɗe (audivisuel), woni teleeji e rajooji. ɗum fof noon ko e gardagol Aamadu Tijjaan Baal. ɗum noon ardorde ndee fof, so wonaa yimɓe ɗiɗo, toɗɗitaama. Ko ni nde siforii :
Hooreejo : Aamadu Tijjaan Baal
Terɗe :
- Mbaarek wul Beyruuk,
- Seyyid wul Bah,
- Sidi Ahmed wul Muhammed ganndiraaɗo Sagiir wul Lebbaat,
- Mayram Jaañ e
- Admeddu wul Mboyriik wul Abdallaahi.
Eɗen ciftina tan ardorde nde waɗi ko terɗe jeegom wonde e hooreejo. E hono no sariya lelniri, ko Hooreejo leydi o toɗɗotoo hooreejo yiilirde HAPA e diiseteeɓe mum ɗiɗo. Terɗe tati keddiiɗe ɗe toɗɗootoo ɗum en ko hooreeɓe cuuɗi sarɗi (Asammbele e Senaa).
