Koolaaɗo Kuuɓal Fedde Ngenndiije Dentuɗe, hono Ban Ki-Moon, toɗɗitaama yo ardo Fedde ndee, duuɓi joy garooji ɗii, tuggude 1 saawiyee 2012. Omo yahra hikka e duuɓi 67 ; o meeɗiino wonde jaagorɗo geɗe jaltuɗe leydi Kooree Worgo.
Ɗum bettaani nde tawnoo alaa kanndidaa goɗɗo woodnoo. Ko leyɗe 15 jeyaaɗe e Goomu kisal Fedde ndee pelliti ɗuum, kam en fof, hay daande waalaani ladde. E seedantaagal makko golle, o hollitii weltaare makko e ko gollaa e daawal ngal o ardii Fedde ndee. O wiyi “en ngardinii, e golle men, geɗe jotondirɗe e mbayliigu weeyo, en njaawii nootaade e faabaade ñallooɓe to Miamaar, to Hayiti, to Pakistaan, en ndaɗndii toon pitaali keewɗi; en tutiima jam to Sudaan, to Somaali, to Konngo (RDC) ».
Wonande mbayliigaaji baɗɗi to leyde Aarabeeɗe, o wiyi : “ darnde Fedde Ngenndiije ina laaɓti heen”, haa arti noon wonande leydi Siiri ndii : “ ko fartaŋŋe mo neɗɗo rokketee laawol gootol e nguurndam mum, waawde nawrude wellitaare e demokaraasİ yeeso ”
Bookara Aamadu Bah
