Maayde Kaddaafi ko yeru wonande kala laamɓe bonɓe e ɓesnguuji mum en.
Mo laamorii fitini, battane mum pinnira ɗum. Mbayliigaaji Tuunus e Misra won ko ɗacci : ɗaccii ardinooɓe leyɗe ɗee, hay so tawii noon mbattini ko e lelnde rafi cellal. Ɗi ɗaccii leyɗe majji e faggudu mum en mbonaani. Kono, sabu tiiɗ koyaagu, Kaddaafi e ɓesngu mum, Libi alaa ko heddorii. Ɓe mbarii laamɗo maɓɓe warngo soofngo, so daasde ɗum e mbeddaa ji, hade maɓɓe werlaade ɗum no jiiba nii. Nde tawnoo ko o culminooɗo ƴiiƴam, ɓe culmii mo ƴiiƴam. Ɓe kelii kuɓеeје, ɓe nduppii galleeji, fof ko maa mahtee.
Ɗum ɗoo noon ko huunde ɓooynde, wonaa jooni fuɗɗii : laamoriiɗo piggal fof battane mum keewaani moƴƴude. Ender daartol winndere ndee, laamɓe bonɓe heewɓe mbattini ko hirseede walla, tawi ko ɓadinооɓе mаɓɓe kirsi ɓe, walla ɓesngu pinnungu daasa ɓе e mbeddaaji gure. Ɗum ne so a ƴeewii, heewi wonde ko laamɓe sifortenooɓe hiisɓe walla yeru, e hitaande 1990, Samuel Doo, hooreejo Liberiyaa, laamorinooɗo piggal, ko rebel en mbari ɗum, cili ɗum, mbaɗti ɗum kette kette, aduna fof ina ndaara. Barnooɗo mo oo, hono Charles Tayloor, daɗii e ɗuum, sibu woni ko e ñaaweede sabu warhoore neɗɗaagu.
Saddaam e Kadaafi noon ko bannge, sibu ɓe njondikinanooki tan e halfude ɓesnguuji maɓɓe, kono ɓe mboomii hay ɓesnguuji leyɗe goɗɗe, to Iraan, Kuwoyt e Caad e yeru. To oon bannge ma a taw ɓe mbiy-noo ko a ɓe ñemmba Adolf Hitler biynooɗo maa halka winndere ndee kala. Kono kanko kam o warti nde o ñoolaa, o wari ɓesngu makko fof.
Kaddaafi kadi, ina waawi wiyeede haɓtiima no feewi. Gila adan o wiyiino wonde ko e leydi makko o maayata, hay gooto hawrataa omo doga. Nde soldateeɓe CNT naati Tiripoli, o luuñciti to wuro ɗo o jibinaa ɗoo. Ko ɓuri lebbi ɗiɗi omo haɓtoo, haa nde o wiyi omo yalta wuro ngoo. Ina wiyee noon, nde o yahi ha o fuɗɗii tampude, o huutorinooma telefoŋ makko. Kо ɗum addani OTAN maantaade nokku ɗo o suuɗii ɗoo e fawde e makko yitere ko ina wona yontere. Nde o wiyi omo doga, doron Amerik e huunde e diwooje OTAN tawi ina ndeeni ɓe. Ko waawnoo heen wonde fof, ko « doron gooto diwi to Sisil, werlii e otooji maɓɓe misilaaji Hellfire (Jaynge jahannama). Woodi heen cumɗi. Kaddaafi dogi, naati e tuwooji diƴƴe kuutoraaɗe, soldateeɓe CNT nanngi mo, tawi omo wuuri. Ko heddii koo, yimɓe fof njiyii ! ! !
Bookara Aamadu Bah
