Pulaar Speaking Association (PSA) ina jooɗoo e batu kuɓtodinngu ñalnde 26 e 27 mee to Memphis, to Dowlaaji Amerik Dentuɗi. Batu nguu yuɓɓintee ko e otel mawɗo, otel Memephis Airport. Wonande Al Hajji Mammadu Saar gardiiɗo catal ngal ɗum ɗoo ko faayiida mawɗo wonande Fuutankooɓe hoɗɓe e wuro ngoo, sibu » amin mbasoroo idaade mahde ɗoo jumaa Afriknaajo, tawi kadi woni almaami mum ko fuutanke « . Jumaa oo wiyetee ko » Al Masjid Attagwa « . Kutbaaji aljumaa ɗii fof mbaɗetee ko e Pulaar. » So a arii e nokku hee, cikkataa ngon-ɗaa ko e mbeddaaji gure Fuuta : maa na ɗoon Pulaar ina haalee, nana Sooninke e Bammbara e Wolof ina kaalee. Min njettii heen Alla ».
Batu Kuftodinngu Fedde ndee heewnoo yuɓɓineede ko e wuro New York, hikka noon ko Catal Memphis heɓi faayiida yuɓɓinde batu nguu. Maa ngu wonan fedde ndee fartaŋŋe yuurnitaade doosɗe mum e sardiyeeji mum.
Fedde ndee sosanoo ko e hitaande 1989, caggal warngo Fuutanke gooto e caɗeele kawranooɗe ngam renndinde jawdi ngam nawtude gooski mum to leydi mum. Fedde ndee sosaa e nder ɗuum. Nde daranii ko nawtude goosɗe (gooskiiji) terɗe mayre cankotooɗe toon. PSA sooda biyeeji ɗiɗi abiyon nawtugol gooski kii e jahol e gartol ɗoftoowo oo, wondude e nduwordi feewde e galle cankiiɗo oo. Fedde ndee alaa keerol, nde faltaaki debbo e gorko e leñol walla leydi.
