Alaa e men mo nanaani haala Tentaan. Waame toɓo regginii fof : koɗorɗe, jawdi e yimɓe fof. Waɗii maayɓe boom. Boomaare mawnde, sibu ndiyam alaa ko woppi, muumti ngoo wuro haa laaɓi. Ko wayi nii meeɗaa kewɗe e Muritani. Yanti heen e balɗe jawtuɗe ɗee, nokkuuji keewɗi e nder leydi ndii toɓaama toɓooli ɓurtuɗi. Ɗum jiidaa e ko njiyaten ñalnde kala e bonanndeeji ile e nder aduna hee. Ɗum ɗoo fof ina goongɗina wiɗtooji annduɓe mbaɗi, kollitooji wonde baylagol ngonka weeyo ina ɓeyda ile. Kono, so en ƴeewii, maa mbiyen wonde ko annduɓe ɓee kaalata koo, ina luurondiri : Heewnoo wiyeede ko baylagol ngonka weeyo maa addu yoorooji, kono baylagol ngonka weeyo maa ɓeydu ile ! Kono tan, annduɓe ko weñcitɓe alluwal ngal, sibu caɗeele ɗee wonaa dow (asamaan e toɓo) ummortoo, alaa, ɗe ummortoo ko les, to leydi, to leɗɗe. Ko kamɓe kaali.
Widto ngoo feeñi ko e jaaynde yaltoore e Engele, wiyeteende Nature, ñalnde 30 ut. Tonngol haala kaa ko hollitde wonde baylagol ngonka weeyo ngol nganndu-ɗaa ɓuri saabaade ɗum ko ɓeydagol gaas karbonik (CO2) e nder weeyo sabu cuurki isinaaji e masinaaji…, maa ustu sokla leɗɗe e ndiyam. Ɗum firti ko maa leɗɗe ustu njaram mumen, sabu ngool ɓeydagol CO2 e nder weeyo. Nii woni, leydi natta moɗde ndiyam toɓooli, no moɗirtunoo nii. Ɗum ɗoon noon riwtaani miijo wiyngo maa toɓooli usto, kono ngo yiɗi hollitde tan ko hay so toɓooli ɗii ustiima ne, ile ko ko njogori ɓeydaade sibu ko ɓuri heewdɗe e ndiyam toɓojam waɗtata ko waamde nde tawnoo leydi moataa ɗum. Nii woni, ile maa ɓeydo fotde 16% e maayirɗe teeminannde wonaande ndee. Ɗum ɗoon noon ko musiiba mawɗo. Ndeke noon, ina gasa winndere waasa ŋakkeede ndiyam e ko fayi arde. Jooni noon, hakkunde bone e musiiba, hay gooto anndaa ko ɓeydagol nguleeki weeyo resani en.
