Beresiil kam ne ina yiɗi labbitinde warhooreeji baɗanoodi e les laamu hoorameewu koninkooɓe. Beresiil sosii goomu “ Nuunɗal”. Ngu ƴettii golle ñalnde aljumaa 18 jolal (noowammbar) 2011. Joɗɗini ngu ko hooreejo leydi oo, hono debbo biyeteeɗo Dilma Rusef. Darnugol nguu ɗoo goomu waɗii haala no feewi, nde tawnoo ngu halfinaa ko wiɗtude jabɓugol jojjanɗe aadee ɓurtungol baɗangol e laamu militeer en (piggal, warngo, teemedde yimɓe majjuɓe menndeŋ…). Dilma Rusef e hoore mum meeɗiino lepteede. O huninooma sosde goomu wiɗto, ɗoon e ɗoon, so o toɗɗaama hooreejo leydi ndii.
Goomu nguu maa ubbit hanki, ɗum ɗoon noon welaani koninkooɓe ɓee, hay so tawii ɓe nattii laamaade leydi ndii ko ina wona jooni duuɓi 25. Waɗi noon ko hay gooto anndaa no foti yimɓe politik luulndinooɓe mbaraa maa cokaa walla leptaa hakkunde 1964 e 1985. Hade ɗuum, ko Sili (Chili) e Arsantiin mbaɗnoo hono ɗee golle ciftorgol. Waɗi ɗum ko koninkoоɓе ɓее ko yaafanooɓe (ƴettunooɓe kuulal ngam yaafaade bonanndeeji jawtuɗi) ; tee denndaangal laamuuji demokarasi garnooɗi caggal maɓɓe ɗooftiima oon yaafuya. Kuulal ngal Komisariyaa jojjanɗe aadee mo fedde Ngenndiije Dentuɗe ñiŋi no feewi, ummitingal haala e Dilma Rusef, hooreejo Beresiil mbaɗatnoo ɗee golle ciftorgol.
Dilmaa haalii, wiyi « Yaltinde goonga wonande hanki men ko huunde teeŋtunde mbele geɗe bayɗe nii bonɗe, tunwinɗe daartol leydi men ina mbaasa waɗtude abada. En mbaawaa woppude deƴƴere tunwina Beresil, sahaa mum yontii ! ” Kono tan nguu ɗoo goomu waawaa fawde kuugal e hay gooto, hay so tawii noon laаɓаnii yimɓe ko baɗnooɗo bonannde Beresiil. Ko hono no keew-ɗen wiyrude nii tan : « Koyngal e leydi, mboddi e leydi, kawraani hikka, kawra mo wuuri » !Kala wonduɓe e gagga warhoore, ina poti anndude wonde ɓooy juuɗe fof, haala mum ko ko haaletee. Ko wasiya wonande ardiiɓe Muritani kadi.
