DAMAL GADANAL : KUULE KUUFTIDINƊE
Kuulal gadanal : Woni faandaare oo ɗoo sariya ko firde hol ko sifortee njiyaagu, hasbude bonannde nde ɗo tolnii e haɓaade baɗe jowitiiɗe e mum.
Kuulal 2 : Macungaagu ko ngonka aadee, mo fannuuji jeyi parlinaa e dow mum, maa wonii ko e fannu keeriiɗo tan, walla e ko huuftodini.
Kuulal 3 : Ina jeyaa e ko harminaa, kala mbaadi paltoor, no ina siforoo kala, parlinaandi e neɗɗo biyeteeɗo ko jiyaaɗo.
DAMAL DIMMAL : BONANNDE E GOLLE KAANTARE JOWITIIDE E NJIYAAGU
Tayre adannde : ko yowitii e bonannde (warkoyaagu) macungagu.
Kuulal 4 : Kala daraniiɗo waɗtude neɗɗo jiyaaɗo walla ittude mdimaagu mum e hurum mum, maa soke ko ina tolnoo e duuɓi joy feewde sappo, fawee alamaan ko ina tolnoo e teemedde joy ujunere (500 000) haa miliyoŋ. Kala etiiɗo waɗtude neɗɗo jiyaaɗo, maa fawe fecceere kuuge potnooɗe faweede e baɗtuɗo neɗɗo jiyaaɗo.
Tayre ɗimmere : ko yowitii e golle kaantaare peewtude e njiyaagu.
Kuulal 5 : Kala leeptuɗo neɗɗo nanngiraaɗo ko jiyaaɗo, maa soke tuggi lebbi jeegom haa duuɓi tati, fawee alamaan tuggi capanɗe joy ujunere haa teemedde ɗiɗi ujunere (200 000 mb)
Kuulal 6 : Kala keɓtuɗo jawdi neɗdо goɗɗo nanngiraaɗo jiyaaɗo, dañal mum ummoriingal e warñeende mum walla kappiiɗo kaake mum, maa soke tuggi lebbi jeegom haa duuɓi ɗiɗi, fawee alamaan tuggi capanɗe joy ujunere (50 000) haa heɓi teemedde ɗiɗi ujunere.
Kuulal 7 : Kala kaɗdo cukalel jaggiraangel jiyaaɗo, jontungel naatde jangde, naatde ekkol, tawi faanditi heen ko huutoraade doole maggel, maa soke tuggi lebbi jeegom haa duuɓi ɗiɗi, fawee alamaan tuggi capanɗe joy ujunere (50 000) haа haa teemedde ɗiɗi ujunere (200 000) :
Kuulal 8 : Kala kaɗɗo, e dow nguyka neɗɗo nanngiraaɗo jiyaaɗo ndonu mum, maa soke tuggi lebbi jeegom feewde duuɓi ɗiɗi, fawee tuggi capanɗe joy ujunere (50 000) feewde teemedde ɗiɗi ujunere (200 000) walla fawee heen gootal e ɗee kuuge (kasoo walla alamaan).
Kuulal 9 : kala desɗo debbo nanngiraado korɗo, tawa wonaa e weleede mum, walla naatnuɗo dewgal, walla kaɗɗo ɗum reseede, tawi wonaa e sago mum, maa soke tuggi lebbi jeegom haa duuɓi ɗiɗi, fawee alamaan tuggi capanɗe joy ujunere (50 000) haa heɓa teemedde ɗiɗi ujunere (200 000) walla fawee heen gootal e kuuge ɗee. So tawii hawrii e nder dewgal he, resondirɓe ɓee mbirnodiima, debbo o ina jogii hakke e teŋe gaadoraaɗe totteede ɗe, etee omo waawi ɗaɓɓude ceergal.
Sukaaɓe dañaaɓe e dewgal he ko ɓіɗɓе gorko o
Kuulal 10 : Naalanke walla ñeeño baɗɗo jime tawi ina mawnina walla ina jarfa heen njiyaagu maa soke tuggi lebbi jeegom haa duuɓi ɗiɗi, fawee alamaan tuggi capanɗe joy ujunere (50 000) haa heɓi teemedde ɗiɗi ujunere (200 000) walla gootal e ɗeen kuuge (kaso walla alamaan). Kuuge kalaaɗe dow ɗe ina pawee e kala baañnjitiiɗo walla caaktuɗo ɗeen jime.
Kuulal 11 : kala neɗɗo nanngiraaɗo golle kiiseteeɗe ko paltoor feewde e nanngiraaɗo ko jiyaaɗo, maa fawe alamaan tuggi teemedere ujunere haa heɓi teemedde tati ujunere. Kala fedde nanngiraande golle kiiseteeɗe paltoor feewde e neɗɗo nanngiraaɗo ko jiyaaɗo, maa fawe alamaan tuggi teemedde joy ujunere (500 000) haa heɓi miliyoŋaaji ɗiɗi (2 000 000).
Kuulal 12 : kala ñaawoowo (Qaadi) walla Waali walla Haakem maa mawɗo ronndismaa, maa sofaaji walla polis walla sanndarmori nooyniiɗo kabaruuji jettiiɗi ɗum, jowitiiɗi e baɗe ciforteeɗe baɗtugol neɗɗo jiyaaɗo, maa soke tuggi duuɓi ɗiɗi haa duuɓi joy, fawee alamaan tuggi teemedde ɗiɗi ujunere (200 000) haa heɓi teemedde joy ujunere (500 000).
Kuulal 13 : kala dariiɗo, e peeñcu, ina aybina neɗɗo nanngiraaɗo ko maccuɗo, maa soke tuggi balɗe sappo goo haa heɓi lewru, fawee alamaan tuggi ujunnaaje joy (5 000) haa hеɓi teemedere ujunere walla gootal e ɗeen kuuge tan (kaso walla alamaan).
DAMAL TATABAL : KUULE KUUFTIDINDE
Kuulal 14 : Waɗdude moojobere e baɗɗo bonannde e fillaaɓe bonanndeeji joopaaɗi e nder oo ɗoo sariya, ko geɗe gaddanooje joom mum faweede kuuge joopaaɗe e nder Doosgal Kuuge (code penal).
Kuulal 15 : kala fedde daraniinde jojjanɗe aadee heɓtinaande to bannge laamu ina jogii hakke suurtude jaɓgngol oo ɗoo sariya, etee daroo ngam wallude loraaɓе e jаɓbugol sariya o. Kala noon dokkuɗo kabaaru mo alaa daliilu, tawa ko ayiiba tan, maa soke tuggi lebbi jeegom haa heɓi duubi joy, fawee alamaan ujunnaaje sappo (10 000) haa heɓi teemedde ɗiɗi ujunere (200 000). So tawii ko ayiiba jowitiiɗo e baɗe macungaagu ummorii ko e fedde, ma nde fawe alamaan teemedere ujunere haa heɓi teemedde tati ujunere (300 000).
DAMAL NAYABAL : KUULE JOОFIIRDE
Kuulal 16 : kala sariyaaji gadiiɗi oo ɗoo sariya, luutondirdi e makko walla ɗi njahdaani e makko, pirtaama. Sariya jaɓaaɗo to Suudu Sardiiji (Asammabele)
ñalnde 8 ut 2007
Firo : Bookara Aamadu Ba
