Miijo ngo laamu Leydi Muritani ƴefti ngam haɓde e mbuusuuji ko huunde heewnde faayiida, ngam teskaade caɗeele ɗe mbuusuuji ngaddi to bannge sato e taariindi. Eɗen mbaawi teskaade ɗee ɗoo geɗe : Mbuus ina addi caɗeele no feewi e jawdi haa teeŋti noon e nduroori. Ko heewi hannde, so njawdi walla ngaari walla mbeewa hirsaama, kuuse mum tawatee ko ina heewi dak mbuusuuji. Mbuus so jooɗiima e reedu gasii, ɗum ina haɗa dammuwol fayde, won sahaaji kadi ina waawi warde ɗum.
Ko ɓuri heewde e kurjuru hannde ko mbuusuuji. Sibu, hay so weddoyaama caggal wuro, henndu ina waawi artirde ɗum e wuro, nde tawnoo ina hoyi. Mbuus ina boni e taariindi sibu ɗum, ko huunde leelnde saayde/bonɗe. Ina waawi haɗde huɗo fuɗde. Heddii ko yimɓe ina poti faamde ɗum ɗoo ko nafoore men mehre nde tawnoo maa ɓeydu moƴƴinde sato men. Ko goonga noon peeje ina poti sakkeede mbele ina waasa waɗde lor wonande yimɓe ɓee, nde tawnoo en njowitiima no feewi e mbuusuuji.
Muñande yimɓe ɓee hay sinno ko ɗoo e lebbi tati mbele kala joginooɗo mbuus, ina waawa seertude heen.
- -Yeewen feewnude mbuusuuji kaayitaaji, lomtoo mbuusuujidalli ɗii : kaayit ina yaawi ñaamtaade (firtaade), kadi so jawdi ñaamii ɗum ina moƴƴi.
- wonande rewɓe duggoyooɓe, ina moƴƴi ɓe mbaɗta huutoraade bidoŋaaji tawa so ɓe coodii nebam walla kosam walla bineegara, eɓe mbaawa waɗde heen, ɗoon ɓurata hisde.Ɓe njogoo bataaji tawa ina waawi waɗde basalle, faataata… Eɗen poti wallitde ngoo ɗoo miijo, mbaasen wiyde ɗum ko dogdu dow huɓeere.
- Laamu nguu daroo kadi mbele geɗe keewɗe gummotooɗe caggal leydi, natta waɗeede mbuusuuji, coomiree kaayitaaji.
- Ina moƴƴi ñalawma laaɓal yuɓɓinee e denndaangal leydi ndii kala, mbele kala to mbuus woni duppee.
Usmaan Naan
Hooreejo fedde nde wonaa Laamuyankoore JCT (Janngde-Cellal-Taariindi)
