E nder ciynugol golle Tuugnorgal Dental Orop wonande Renndo Siwil e Pinal (PESCC) Fedde Ɓamtaare Pulaar e Muritani (ARPRIM) kam e fedde Sifaa Hanki pinal Hannde ɗaɓɓidii, keɓi ballal kaalis (hedde 18 miliyoŋ UM tawi heen 10% ko pelle ɗee ndifii) ngam siynude eɓɓaande inniraande KOOLOL NGENNDIWOL KEEWAL PINE, tuggi mars haa suwee 2016 (lebbi 4).
Fedde Ɓamtaare Pulaar e Muritani (F.Ɓ.P.M.) ko fedde pinal sosaande e hitaande 1974, heɓtinaande e hitaande 1976 fawaade e laawol sariya ngol tonngoode 64.098 mo 9 suwee 1973 e 73.157 mo 2 sulyee 1973 e seedewol tonngoode 00542/MINT/SAD/04 ngol suwee 1976. Joɗnde fedde ndee ko Nuwaasoot, to Socogim-PS, galle tŋ 160 A. Fedde ndee ina jogii cate to Nuwaasoot, Nuwaadibu, Suwoyraat, Rooso, Ɓoggee, Baabaaɓe, Kayhayɗi, Likseyba 1, Jowol, Faraa Liitaama, Sehilbaabi, Kiifa. FƁPM daranii ko ɓamtude e reende hakkeeji aadee haa teeŋti noon e hakkeeji pinal. Nde daranii ko jaŋde mawɓe e findinde ɓesngu kam e golle ñeeñal e pinal e eɓɓaaɗe ƴellitaare paatuɗe e ɓamtaare ɗemɗe e pine ngenndiije e mbaadi kuuɓtodinndi, haa teeŋti noon e ɗemnga e pinal haalpulaar en.
Fedde Sifaa Hanki Pinal Hannde (SIFAA) ko fedde pinal sosaande e hitaande 1979, nde laamu heɓtini e hitaande 2002, fawaade e sariya tŋ 64.098 mo 9 suwee 1973 e sariya tŋ 73.157 mo 2 sulyee 1973, e seedewol tŋ 0396 mo 9 desaambar 2002/MIPT/DLP. Joɗnde mayre ko Nuwaasoot, to Duɗal Ngenndiwal Gaaci (ɗo wonnoo Galle sukaaɓe keso). Sifaa Hanki Pinal Hannde ko njuɓɓudi pindinoori yimɓe e geɗe mawɗe dookɗe winndere ndee, ko wayi no ɓamtaare e ñawbuuli e baasal e jaɓɓugol jojjanɗe aadee ekn. Kono kadi ande daranii tiiɗtingol mahondiral hakkunde leƴƴi leydi ndii.
