Ñalnde 28 settaaburu 2006 haa 28 settaamburu 2007, timmii hitaande, ko ñalnde heen musiɗɗo Saydu Kan yalti aduna caggal nde o waɗi aksidaa e oto tawi omo yaha ŋooso Muritani. Ñalawma sankaare makko mawninaama no feewi to ŋooso to e ɗoo e Nuwaasoot. E oon subaka aljumaa 28 settaamburu 2007 hedde waktu 5ɓo e 30 hojom weetndoogo, sete mawɗo ummiima ɗo e Nuwaasoot, feewde ŋooso,ɓe pottii toon e yimɓe woɗɓe ummiiɓe baŋ-yoo-baŋ e Moritani kam e senegaal. Nde ɓe njettii ŋooso nde ɓe payi galle Ceerno Baaba, ko ɗoon ɓe mbaɗi silke deftere kaamiilu nde. Nde ɓe ngasni, ɓe nduwanii musiɗɗo o kam e denndaangal maayɓe juulɓe. Nde ɗum gasi tawi weetii, seteeji ɗii fof payti baamuule ŋooso to, ngam juuroyaade yenaande musiɗɗo Saydu Kan. Duwaawu oo gasi tawi ñawlii, yimɓe ɓe ceerti… E laawol maɓɓe gartol, sete o telliima e nokku ɗo oto Saydu Kan en yannoo ɗo, haalaluuji keewɗi kam e miijooji peeñii yo o nokku o maantore, waɗee wuro, inniree mo, walla mahee huunde faayodinnde, naftoore, o inniree…
E oon subaka, sete o arti Nuwaasoot ko tawi hiirii, ɓe ndokkondiri e banndiraaɓe ɓe fof aadi ñalnde heen jamma, saanga waktu 22 to nokku biyeteeɗo la Case. Nde waktu 22 yonti nde, dingiral galle la Case heew haa wiyi dak yimɓe, maa mbiyaa alaa keddiiɗo mo tawtoraaka.
Musiɗɗo Daawuuda Abdullaay Dem, cukko hooreejo Fedde Ɓamtaare Pulaar e Muritani, kam e musiɗɗo Aamadu Jibeeri nootaninoo Fedde nde e noddaandu goomu ngenndiiwu kuufgol siftino ngo. Ñalnde heen jamma, hoohooɓe heewɓe ngarii nootitaade e hiirde siftino nde. Kamɓe fof e haala maɓɓe, ɓe peñninii jaambaraagal, kaaraysiraagal Saydu, ɓe nganndinii renndo ngo wonnde musiɗɗo Saydu Kan wonaa tan mo fulɓe, wonaa kadi mo safalɓe, ko mo Muritani kala, mo ɓaleeɓe e safalɓe kala. Darnde makko wonnoo ko ngootaagu ɓesngu Muritani no fotiri. O duñii yimɓe yo njiiloyo ganndal, yo kaɓano miijooji, njogoo fiɓnde. Yo ngollano leydi Moritani, mbaasa tan gollanaade jaybaaji mum en. Ɓe kollitii kamɓe fof, ko o neɗɗo potɗo ñemtineede, sibu cellugol miijooji makko, darnde makko, golle makko, e gilli makko leydi Moritani, sibu ɓe mbiyi ko hare makko fof ko potal Muritaninaaɓe, gooto kala yo heɓ hakke mum, teddina goɗɗo o. Ɓe mbiyi o daraniima laŋ hakkeeji taccinaaɓe, kam e waraaɓe, kono tan nde ndeen hare ari e timmude nde, hawrii o yahii, so omo ɗo wonnoo, renndo Muritani ina sokli mo sanne sibu ko o neɗɗo ngaal beldal. Ɓe mbiyii o yahii, kono o maayaani, sibu golle makko e balle makko fof ina keddii.
E nder heen ɓe kollitii wonnde eɓɓaande sosde Fedde nde o inniraa, etee tawi ko miijooji pinal e ganndal ina jogori soseede e balɗe garooji, kala heɓiiɓe e jokkude golle makko, darnde mum en ina soklaa heen no feewi, maa noddaandu waɗe ngam tintinde yimɓe kala. E jammaagu hee ɓe baɗii kollirgol filmo ko fayti e yeewtere nde o waɗnoo to Amerik, to fedde Fuutankooɓe wonɓe toon ɓe. Omo haala heen ko fayti e ɗemngal pulaar, daartol mum. Omo haala heen kadi mo woni kanko, hono nguurndam makko. E oon jamma kadi yimooɓe heewɓe anndaaɓe tawtoraama ngaddii ballal mum en to baɗte ñeeñal mum en.
Mammadu Maamuudu Baal e Aamadu Jibeeri Sih
