Ñalnde 21 abriil 2013, lappol COD (luulndo), egardagol Jamiil Mansuur gardiiɗo e mudda, yahii juuraade Mesawuud wul Bulkayri to galle mum. Ina jeyanoo e lappol hee, Ahmed Daddaa, hooreejo RFD, e Muhammed Mawluud, hooreejo UFP, e Mammadu Alasan Bah, hooreejo Plej, e Muusaa Faal, hooreejo MCD, e Saaleh wul Hananna, hooreejo Haatem, e Siidi wul Kowri, hooreejo Unad. Bayyinaango COD yaltini caggal ɗuum hollitii wonde « Mesawuud jeɓɓiima lappol ngol no moƴƴi ». Wondunoo e makko ko Bojel, hooreejo Wiam e Adbul Salaam Horma, hooreejo Sawab e Mustafa Abeydarahmaan, hooreejo RD, e Ahmed Hamsa, hooreejo CUN.
Nawnoo toon COD ko jaabtaade miijo Mesawuud sakkitnoo ngam yaltinde Muritani e kiris woni e mum oo. Ina wayi no, COD holliti heen, ko ina wondi e Mesawuud e ngoon miijo, fotngo yuumtude e juɓɓingol woote laaɓtuɗe, nuunɗuɗe, ɗe yimɓe fof kawri.
Jooni fadaa ko e jaabawol senngo laamu nguu, walla mbiyen Abdel Asiis, hooreejo leydi ndii. To oon bannge, dental biyeteengal CP, denndinngal partiiji tati, hono MPR mo Haamiidu Baaba Kan, e Adil mo Wul Waagef e RD mo Mustafa Abeydarahmaan, habrii, ñalnde heen kadi (21/04 ndee) wonde yaltii e senngo laamu nguu, woni nattii wondude e wallitooɓe Abdel Asiis. Hujja mo ɓe kolliti, ko «salaade senngo laamu nguu haaldude e denndaangal doole politik leydi ndii, haa teeŋti noon e Jokkorde Luulndo Demokaraasi (COD)». E wiyde AP (Alliance Patriotique = Maalde ngenndiire), CPM (coalition des partis de la majorité présidentielle = Haɓɓere Partiiji Laamu) « nattii wonde waawde roondaande yaakaare ɓesngu Muritani ». Kamɓe yaltuɓe senngo laamu jooni ɓee, ɓe mbiyi kamɓe ne, aɓe njaɓi miijo Mesawuud sakkiti ngoo, ngo faandaare mum woni « juɓɓingol kaaldigal hakkunde denndaangal gollooɓe politik leydi ndii « ngam waawde yuɓɓinde woote sarɗiije (legislatives) e meeriije koolniiɗe, laaɓtuɗe, nanondiraaɗe ». Jooni, eɗen mbaawi wiyde, «senngo laamu ŋalii» sibu alaa ko heddii toon ko maantini so wonaa UPR mo nganndu-ɗaa kañum ne, ko parti denndinɗo yimɓe seedatanaaɓe wondude e kala laamɗo garɗo, gila e Maawiyya, ƴaaŋan maa, Eli e Siidi, haa yettii wul Abdel Asiis.
Bookara Aamadu Bah
