Hanki Mbaggu dilla, wiyee alamari dillii, wolde waawi-feŋoo sompee.
Hanki sabareeji unngoo, wiyee aguyaaji ndilli, haɓantooɓe ndimaagu ndadoo.
Hanki tabalde fiya, wiyee laamɗo noddii, waali-wuro en piya ndiirgu.
Hanki baggel ɗojja, wiyee “ko baggel raddo!”, Kibbo e Dannaa naata he ladde hakkunde lolooɓe jaraale e feekotooɓe jiriile, ladde dudnaa ladde duntaa bay jehreende.
Hannde kuɗol saaƴa, binndi caroo. Binndi kaalis coobodoo e piindi. Piindi kaŋŋe puɗndi he limmbam conñce.
Hannde kadi eɗen mbaɗa coñce, so fodaama. Eɗen nduttoo he coñce coñaaɗe he kunuɗe joololon kaŋŋe. Walla mbiyen coñce cuppitiiɗe he pundi duƴƴe nawa-lanka en. So yimɓe nanii konguɗi maɓɓe (konngi jarabi doolnuɗi) aduna yerɓa. Ɓee pina pinna ndadoo, ɓeya mbeytoo njannjiloo.
En ngariino haa he Biyeteeɗo Ndoondi soowiraa ndoondi-Haali, kono kadi hade men weegaade he Ndoondi ndutto-ɗen to “waliyaaɓe Jenni”. Waɗde ngaddoyen Mammadu Banduru Baaba Mum Faati. Eɗen ciftina wonde Baaba mum Faati ina anndiraa wonde belɗo, jalnoowo yimɓe heen sahaa, haa ɗum waɗa hay so o yennii yimɓe keewaani mettinande mo ; so mettinii ne, omo waawi artude haa ɓe mbeldita. Kono kadi omo anndiraa ñeeñɗude he miijaade huunde ɗoon-e-ɗoon, o waɗta ɗum he jimol makko, walla haalorde haaju mum he nder jimol.
O meeɗii arde he wuro, o yiɗi jippaade sehil makko capaato, oon salii. O jippii goɗɗo. ndeen o feŋii fijirde, oon nuli toon biyeteeɗo Muhammad Lamiin heɗoo, ƴeewa so o yennaani ɗum. Woodi ñuumbaniiɗo mo he hiirde he ɗoon ɗo o yimata ɗoo. hay haayti yennude sehil makko oo, o yenni nulaaɗo oo.
O wiyi:
Muhammad Lamiin Huus hok
Henndu boygiil warii min
Firti ko “Muhammad Lamiin abbo too. Luuɓeeki henndu ngaccu-ɗaa nduu warii min ».
O meeɗii, he gootol e lappi makko, o jippii esiiko. Oon warani mo. Ndeen o doorii o wiyi :
“Galo doorii he galle galo, ndokkee…”
Debbo makko jaɓani mo wiyi :
“Sinndo ko a galo a doorataa, ndokkee…”
O wiyi :
“jooni mi hela… ndokkee…”
Debbo o wiyi:
” ndeen dey mbaɗaa ko ngoowno-ɗaa, ndokkee…”
Ɓe kaɓi heen, debbo oo suutii hay gooto tinaani.
Kono kadi ko he jimɗi ɓe kawriti. Haala Mammad Banduru gasataa ɗoo.
Aamadu Sammba Demmbele
