Ñalnde ñalli aljumaa jofi aset, hoore biir, ɗo wiyeteе gite mbiljinii cuwaa, majje lugge, cewɗe, carfuɗe, ɗelñi e tiinde buulel. Ina hawraa nduun lobbudu so majii, kala demoowo, hakkille mum ina arta e ruumaano mum rawane. Jom teskuyaaji en ine cifoo, mbiya “ ko nii dey wayatnoo nde jam waɗa ”.
Leelaani golal ruƴƴi fuɗnaange rewo, haa totti laaci maayo worgo, kibbo haftii, darii, yiili hoore, moosi sappii, o wiyi : “ Ndin ! Sammba uumi ñawaani, ceŋelal sippooɓе, jeykal remooɓe, dilli wuura, dillaani baayeeji maa ndaase. Yo ar adda jam, adda ko heƴi e juuɗe men ”, Nder oon jamma, nde yahi haa feccini, henndu wutti, kammu e leydi njokkondiri, baaɗe coori (cooki), majje e kartaali e ndiyam fof coomondiri, leelaani caaɗli pusi, beeli keewi lattinii, maayo soori gila weetaani, ɗum ko golle ngatamaare !
Nde yimɓe pini subaka, rewɓe e worɓe, sukaaɓe e mawɓe, gooto fof finiri ko weltaare, coftal e cagataagal mawngal, sabu ñalnde jañja mbaaɗdi alaa, gooto fof ko sagata. Ko ɗum waɗi Sammba Mamdu e Mammadu Kuñnjo, gooto е maɓɓe fof ina jañnjitira bannge, ina hargitoo ɓesngu mum yo yaawno weetii, sabu golle ko law.
Ɗoon e yontere tawata ko gawri fuɗii, huɗo fuufii, leydi suɗoo, suddoo leƴƴi puɗi kecci, muumon Alla mbeltoo, leɗɗe olnooɗe ndañta caayaale kese, nguboo, nguuboo, kullon ladde cuuroo gite waañooɓe. So ladde ndee suɗoriima nii, ko ndeen mbiyaten nakkon men puɗɗiima ɓesnude, sabu ndammiri morsat, nayi paytoo, ɓerɗe aynaaɓe ndeeƴa, keccol riiwa yooro, yaajeende riiwa faaɗeende, ɓuuɓol riiwta mbooy, jam dañtee, Fuuta welta, yeewta, ferɓe e ɗanniinooɓe ngarta, woni jam dañtaama …
Abbaas Baayel Ac, Catal Nuwaadibu (Fooyre Ɓamtaare t 25/2ɓ, darorɗe 1987)
